वीरगंज । पर्साको कालिकामाई गाउँपालिका–२, भेडिहारी टोलमा शुक्रबार आयोजित निःशुल्क आँखा परीक्षण शिविरमा १६० जनाले सेवा लिएका छन् । शिविरमा परीक्षण गराएकामध्ये ३५ जनामा मोतियाबिन्द भेटिएको छ ।
नेपाल पासवान संघ, पर्सा र राष्ट्रिय दलित पत्रकार संघ, पर्साको संयुक्त आयोजनामा तथा तिलगंगा आँखा प्रतिष्ठान, काठमाडौंको सहयोगमा स्थानीय समाजसेवी शम्भु पासवानको दैलोमा शिविर सञ्चालन गरिएको हो । शिविरमा दलित, मुस्लिम तथा अन्य समुदायका स्थानीय बासिन्दाले निःशुल्क आँखा परीक्षण गराएका थिए ।
शिविरमा खटिएका डा. प्रभात चौरसियाका अनुसार परीक्षणका क्रममा ३५ जनामा मोतियाबिन्दको समस्या पहिचान भएको छ । ती बिरामीहरूको शनिबार वीरगंज सामुदायिक आँखा अस्पतालमा निःशुल्क शल्यक्रिया गरिने व्यवस्था मिलाइएको उनले जानकारी दिए ।
स्थानीयस्तरमै विशेषज्ञ सेवा उपलब्ध गराउँदा आर्थिक अवस्था कमजोर भएका नागरिकलाई ठूलो राहत पुगेको आयोजकले जनाएको छ ।
शिविरमा राष्ट्रिय दलित पत्रकार संघ, पर्साका सल्लाहकार बृजलाल पासवान, नेपाल पासवान संघका नेता जयकुमार पासवान लगायत स्थानीय समाजसेवी तथा सर्वसाधारणको उल्लेखनीय उपस्थिति रहेको थियो ।
