वीरगंज । राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनअन्तर्गत सम्पन्न केन्द्रीय सदस्य निर्वाचनमा पर्साकी समानुपातिक प्रतिनिधिसभा सदस्य सुनिता कुमारी चौधरी केन्द्रीय सदस्यमा निर्वाचित भएकी छन् ।
पर्साको पकहाँ मैनपुर गाउँपालिका–१, धोरे निवासी चौधरी प्रादेशिक कोटाअन्तर्गत मधेश प्रदेशबाट १ हजार ३०७ मत प्राप्त गर्दै केन्द्रीय सदस्यमा निर्वाचित भएकी हुन् ।
यस्तै, पर्साका निवर्तमान केन्द्रीय सदस्य डा. नन्दन यादव भने पराजित भएका छन् । उनले मधेशी खुला समूहबाट उम्मेदवारी दिएका थिए । उक्त समूहमा उनले ७६८ मत मात्र प्राप्त गरेपछि केन्द्रीय सदस्यमा पुनः निर्वाचित हुन सकेनन् ।
यसैबीच, बाराबाट निर्वाचित दुई प्रतिनिधिसभा सदस्य पनि रास्वपाको केन्द्रीय सदस्यमा निर्वाचित भएका छन् । बारा निर्वाचन क्षेत्र नम्बर–३ का प्रतिनिधिसभा सदस्य अरविन्द साह मधेशी समूहतर्फ ८७० मत प्राप्त गर्दै विजयी भएका हुन् ।
त्यस्तै, बारा निर्वाचन क्षेत्र नम्बर–४ का प्रतिनिधिसभा सदस्य रहबर अन्सारी मुस्लिम समूहतर्फ १ हजार ४५ मत प्राप्त गरी केन्द्रीय सदस्यमा निर्वाचित भएका छन् ।
मधेशी समूहतर्फ बब्लु गुप्ता, दीपक कुमार साह, जुली यादव र कामिनी कुमारी चौधरी पनि केन्द्रीय सदस्यमा निर्वाचित भएका छन् ।
