वीरगंज । प्राविधिक तथा व्यावसायिक शिक्षा तथा तालिम (TVET) हासिल गरेका युवाहरूलाई रोजगारीका अवसरसँग प्रत्यक्ष रूपमा जोड्ने उद्देश्यले वीरगंज उद्योग वाणिज्य संघ (BiCCI) को आयोजनामा तथा QualiTY परियोजनाको प्राविधिक सहयोगमा वीरगंजमा एकदिने रोजगार मेला सम्पन्न भएको छ ।
आयोजकका अनुसार रोजगार मेलाले उद्योग क्षेत्र र प्राविधिक शिक्षालयबीचको सहकार्यलाई थप सुदृढ बनाउँदै दक्ष जनशक्तिको माग र आपूर्तिबीचको दूरी कम गर्ने महत्वपूर्ण प्रयास गरेको छ । कार्यक्रममा विभिन्न प्राविधिक शिक्षालयमा अध्ययनरत तथा हालै स्नातक गरेका १५० भन्दा बढी विद्यार्थीहरूको उत्साहजनक सहभागिता रहेको थियो ।
मेलामा सहभागी विद्यार्थीहरूलाई रोजगार अभिमुखीकरण, प्रभावकारी बायोडाटा (CV) तयार गर्ने तरिका, रोजगार आवेदन प्रक्रिया, अन्तर्वार्ताको तयारी तथा कार्यस्थलमा अपेक्षित व्यवहार सम्बन्धी जानकारी प्रदान गरिएको थियो । सहभागीहरूले यस्ता गतिविधिले श्रम बजारमा प्रवेश गर्न आवश्यक ज्ञान, सीप र आत्मविश्वास अभिवृद्धि गर्न सहयोग पुगेको बताएका छन् ।
रोजगार मेलामा औद्योगिक तथा उत्पादन क्षेत्रका विभिन्न प्रतिष्ठित कम्पनीहरूको सक्रिय सहभागिता रहेको थियो । जगदम्बा इन्टरप्राइजेज प्रालि, सर्वोत्तम स्टिल, केएल दुगार प्रालि, KNP Nerolac, हिमालयन डिस्टिलरी, लाइफ स्टार फार्मास्युटिकल्स, पतञ्जलि आयुर्वेद, हुलास स्टिल इन्डस्ट्रिज तथा एपेक्स फार्मास्युटिकल्स प्रालिका प्रतिनिधिहरूले दक्ष जनशक्ति छनोटका लागि अन्तर्वार्ता सञ्चालन गरेका थिए ।
विशेषगरी मेकानिकल, इलेक्ट्रिकल/इलेक्ट्रोनिक्स तथा सिभिल इन्जिनियरिङ विषयका १०० भन्दा बढी विद्यार्थीहरूको अन्तर्वार्ता लिइएको थियो । उद्योगहरूको आवश्यकता र विद्यार्थीहरूको दक्षताको आधारमा गरिएको प्रारम्भिक छनोट प्रक्रियामार्फत कम्तीमा १५ देखि २० जना विद्यार्थीहरू रोजगारीका लागि छनोट भएको जनाइएको छ । छनोट भएका विद्यार्थीहरूको नियुक्ति प्रक्रिया सम्बन्धित उद्योगहरूमा उपलब्ध पदअनुसार अगाडि बढाइने बताइएको छ ।
कार्यक्रममा सहभागी उद्योगी तथा शिक्षण संस्थाका प्रतिनिधिहरूले यस्ता रोजगार मेलाले शिक्षाबाट रोजगारीतर्फको यात्रालाई सहज बनाउनुका साथै उद्योग क्षेत्रलाई आवश्यक दक्ष जनशक्ति उपलब्ध गराउन महत्वपूर्ण भूमिका खेल्ने धारणा व्यक्त गरेका थिए । उद्योगको आवश्यकता अनुसार सीपयुक्त जनशक्ति उत्पादन गर्न शिक्षालय र निजी क्षेत्रबीच निरन्तर सहकार्य आवश्यक रहेकोमा समेत जोड दिइएको थियो ।
आयोजकका अनुसार रोजगार मेला केवल रोजगारी उपलब्ध गराउने माध्यम मात्र नभई विद्यार्थीहरूलाई उद्योग क्षेत्रसँग प्रत्यक्ष परिचित गराउने, श्रम बजारको वास्तविक मागबारे जानकारी दिने तथा भविष्यको करियर निर्माणका लागि मार्गदर्शन प्रदान गर्ने प्रभावकारी प्लेटफर्मका रूपमा स्थापित हुँदै गएको छ ।
यस्ता कार्यक्रमहरूले नेपालमा प्राविधिक तथा व्यावसायिक शिक्षाको गुणस्तर अभिवृद्धि गर्न, युवाहरूको रोजगारी क्षमता बढाउन तथा उद्योग क्षेत्रको दक्ष जनशक्तिको आवश्यकता पूरा गर्न महत्वपूर्ण योगदान पुर्याउने अपेक्षा गरिएको परियाेजनाका मृत्रदेव यादवले जानकारी दिए ।
