काठमाडौं । सर्वोच्च अदालतले पत्रकार किशोर श्रेष्ठलाई रिहा गर्न परमादेश जारी गरेको छ । सर्वोच्चले श्रेष्ठलाई हाजिरी जमानीमा छाडेर वा तारिखमा राखेर अनुसन्धान अघि बढाउन आदेश दिएको हो ।
श्रेष्ठकी पत्नी सरस्वती श्रेष्ठले दायर गरेको बन्दी प्रत्यक्षीकरणको रिटमाथि सुनुवाइ गर्दै न्यायाधीशद्वय नहकुल सुवेदी र बालकृष्ण ढकालको इजलासले यस्तो आदेश दिएको हो ।
जनआस्था अनलाइनमा प्रकाशित समाचार तथा तस्वीरका कारण वैयक्तिक गोपनीयताको हक हनन भएको भन्दै प्रहरीले श्रेष्ठलाई गत साउन २७ गते पक्राउ गरेको थियो । त्यसयता उनलाई हिरासतमा राखेर अनुसन्धान भइरहेको थियो ।
सर्वोच्चको आदेशमा श्रेष्ठले समाचारमा प्रयोग गरेको तस्वीर जाहेरवाला स्वयंले सामाजिक सञ्जालमा पोस्ट गरेको देखिएको उल्लेख छ । उक्त तथ्यलाई विपक्षीले खण्डन गर्न नसकेको भन्दै सर्वोच्चले श्रेष्ठलाई हिरासतमा राखिरहनुपर्ने अवस्था नदेखिएको ठहर गरेको हो ।
सर्वोच्चले श्रेष्ठलाई रिहा गर्नुका साथै उनको घर तथा कार्यालयबाट प्रहरीले बरामद गरेका सबै सामानसमेत फिर्ता गर्न आदेश दिएको छ ।
