वीरगंज । पर्सामा अवैध रूपमा नदीजन्य बालुवा उत्खननमा संलग्न १९ वटा ट्याक्टरसहित १५ जना चालकलाई प्रहरीले नियन्त्रणमा लिएको छ । साथै भन्सार छली नेपाल भित्र्याइँदै गरेका ७ वटा पाडोसहित एक जनालाई समेत प्रहरीले नियन्त्रणमा लिएको छ ।
जिल्ला प्रहरी कार्यालय पर्साका अनुसार विभिन्न मिति र स्थानबाट अवैध रूपमा नदीजन्य बालुवा उत्खनन गरिरहेको अवस्थामा १९ वटा ट्याक्टर र चालकहरूलाई नियन्त्रणमा लिइएको हो । नियन्त्रणमा लिइएका चालक तथा ट्याक्टरलाई थप अनुसन्धान तथा आवश्यक कारबाहीका लागि पर्सागढी नगरपालिकाको कार्यालयमा दाखिला गरिएको प्रहरीले जनाएको छ ।
यसैगरी, श्रावण ३१ गते साँझ करिब ६ः३५ बजे पकाहामैनपुर गाउँपालिका–१ धोरेस्थित दशगजा क्षेत्रबाट भन्सार छली चोरी पैठारी गरी भैंसी तथा पाडो नेपाल भित्र्याइँदै गरेको अवस्थामा ७ वटा पाडोसहित एक जनालाई प्रहरीले नियन्त्रणमा लिएको छ ।
प्रहरी चौकी धोरेबाट खटिएको टोलीले भारतबाट अवैधरूपमा डो¥याउँदै नेपालतर्फ ल्याइँदै गरेका करिब २ लाख ४० हजार रुपैयाँ बराबरका ७ वटा पाडो र पर्साको बिन्दवासिनी गाउँपालिका–५ का ३८ वर्षीय फिदा हुसेनलाई नियन्त्रणमा लिएको हो ।
पाडोसहित पक्राउ परेका हुसेनलाई थप अनुसन्धान तथा आवश्यक कारबाहीका लागि वीरगंज भन्सार कार्यालयमा बुझाउने प्रक्रिया भइरहेको जिल्ला प्रहरी कार्यालय पर्साले जनाएको छ ।
प्रहरीका अनुसार बालुवा उत्खननमा प्रयोग भएका ट्याक्टर र चालकलाई पटेर्वासुगौली गाउँपालिका–४ निचुटा तथा पर्सागढी नगरपालिका–३ वडनिहारलगायतका स्थानबाट नियन्त्रणमा लिइएको हो ।
जिल्ला प्रहरी कार्यालय पर्साका प्रवक्ता तथा सूचना अधिकारी प्रहरी नायब उपरीक्षक चक्रबहादुर मल्लले अवैध उत्खनन तथा चोरी पैठारी नियन्त्रणका लागि निगरानी बढाइएको जानकारी दिए ।
