वीरगंज । अत्यधिक गर्मीका कारण बालबालिकाको स्वास्थ्यमा प्रतिकूल असर पर्न सक्ने अवस्थालाई मध्यनजर गर्दै वीरगंज महानगरपालिकाले दुई दिनका लागि सबै विद्यालय बन्द गर्ने निर्णय गरेको छ ।
वीरगंज महानगरपालिकाको शिक्षा प्रशासन महाशाखाद्वारा जारी सूचनाअनुसार महानगरपालिका क्षेत्रभित्र सञ्चालित बाल विकास केन्द्रदेखि कक्षा १२ सम्मका सबै सामुदायिक तथा संस्थागत विद्यालय (मन्टेश्वरीसहित) मिति २०८३ असार ११ गते र १२ गते बन्द रहनेछन् ।
महानगरपालिकाले बढ्दो तापक्रम र गर्मीका कारण विद्यार्थीहरूको स्वास्थ्य सुरक्षालाई प्राथमिकतामा राख्दै उक्त निर्णय गरेको जनाएको छ । बन्द अवधिको विदा भने वार्षिक वर्षे विदाबाट कट्टा हुने गरी व्यवस्थापन गरिएको सूचनामा उल्लेख छ ।
शिक्षा प्रशासन महाशाखाका प्रमुख आनन्द लामिछानेद्वारा जारी सूचनामा सबै विद्यालयलाई निर्णय कार्यान्वयन गर्न तथा अभिभावक र विद्यार्थीलाई जानकारी गराउन अनुरोध गरिएको छ ।
महानगरपालिकाले मौसम अनुकूल नभएसम्म आवश्यक सतर्कता अपनाउन तथा बालबालिकाको स्वास्थ्य सुरक्षामा विशेष ध्यान दिन समेत आग्रह गरेको छ ।
