वीरगंज । गौतम माध्यमिक विद्यालय, वीरगंजमा गत शैक्षिक वर्षमा उत्कृष्ट शैक्षिक उपलब्धि हासिल गरेका प्रतिभाशाली विद्यार्थीहरूलाई सम्मान तथा प्रोत्साहन गर्ने उद्देश्यले आयोजित ‘विद्यार्थी उपलब्धि सम्मान समारोह’ भव्य रूपमा सम्पन्न भएको छ ।
विद्यालयले शैक्षिक उत्कृष्टतालाई प्रोत्साहन गर्दै नर्सरीदेखि कक्षा ९ सम्म उत्कृष्ट नतिजा हासिल गर्ने विद्यार्थीहरूलाई सम्मान गरेको हो । सम्मानित विद्यार्थीहरूलाई प्रमाणपत्र तथा मायाको चिनो प्रदान गर्दै आगामी दिनमा पनि निरन्तर मेहनत, अनुशासन र लगनशीलताका साथ अध्ययनमा अग्रसर हुन प्रेरित गरिएको थियो ।
विद्यालयकी म्यानेजिङ डाइरेक्टर परीक्षा पिया लामाकाे अध्यक्षतामा भएकाे कार्यक्रममा विद्यालयका पूर्व विद्यार्थी तथा हाल नारायणी अस्पताल वीरगंजका चिकित्सक डा. सफ्रोज अन्सारी प्रमुख अतिथिका रूपमा सहभागी भएका थिए ।
कार्यक्रमलाई सम्बोधन गर्दै अतिथिहरूले विद्यार्थीहरूको मेहनत, अनुशासन र निरन्तर प्रयासको प्रशंसा गर्दै यस्ता उपलब्धिले विद्यालय, अभिभावक तथा समाजलाई गौरवान्वित बनाउने बताए । वक्ताहरुले विद्यार्थीहरूलाई आगामी दिनमा अझ उत्कृष्ट नतिजा हासिल गर्दै आफ्नो लक्ष्यतर्फ निरन्तर अघि बढ्न शुभकामना व्यक्त गरे ।
विद्यालयका प्रिन्सिपल गणेश क्षेत्रीले विद्यालयले गुणस्तरीय शिक्षासँगै विद्यार्थीहरूको समग्र व्यक्तित्व विकासमा विशेष जोड दिँदै आएको बताए । उनले यस्ता सम्मान कार्यक्रमले विद्यार्थीहरूमा आत्मविश्वास, प्रतिस्पर्धात्मक भावना तथा थप उत्साहको विकास हुने विश्वास व्यक्त गरे ।
विद्यालयकाे सभाहलमा भएकाे कार्यक्रममा सोनम लामा, रमेश शर्मा, ललित कर्ण, सौराज प्रधान, सिपेन्द्र गुप्ता लगायत शिक्षक–शिक्षिका, अभिभावक तथा विद्यार्थीहरूको उल्लेखनीय सहभागिता रहेको थियो । विद्यालयले आगामी दिनमा पनि शैक्षिक उत्कृष्टतालाई प्रोत्साहन गर्ने यस्ता कार्यक्रमलाई निरन्तरता दिने जनाएको छ ।
