वीरगंज । पर्साका चार स्थानीय तहमा नयाँ प्रमुख प्रशासकीय अधिकृत हाजिर भएका छन् । पटेर्वा सुगौली, धोबिनी, छिपहरमाई र पकाहाँमैनपुर गाउँपालिकामा नयाँ प्रमुख प्रशासकीय अधिकृत हाजिर भई जिम्मेवारी सम्हालेका हुन् ।
पटेर्वा सुगौली गाउँपालिकामा महमद नवाज हुसैन, धोबिनी गाउँपालिकामा सञ्जीव कुमार यादव, छिपहरमाई गाउँपालिकामा सर्वजीत कुमार झा र पकाहाँमैनपुर गाउँपालिकामा सुमित कुमार सिंहले पदभार ग्रहण गरेका छन् ।
नयाँ प्रमुख प्रशासकीय अधिकृतहरूलाई सम्बन्धित गाउँपालिकाका जनप्रतिनिधि तथा कर्मचारीहरूले स्वागत गर्दै सफल कार्यकालको शुभकामना दिएका छन् । पालिकाहरुमा आयोजित स्वागत तथा परिचयात्मक कार्यक्रममा जनप्रतिनिधि र कर्मचारीहरूले फूलमाला, अबिर तथा गमछा ओढाएर स्वागत गरेका थिए ।
पदभार ग्रहण गर्दै चारै पालिकाका प्रमुख प्रशासकीय अधिकृतहरूले प्रशासनिक कामलाई व्यवस्थित बनाउँदै नागरिकलाई सहज, सरल, छिटोछरितो र गुणस्तरीय सेवा उपलब्ध गराउने प्रतिबद्धता व्यक्त गरेका छन् ।
उनीहरूले स्थानीय तहको विकास निर्माण, योजना कार्यान्वयन, सुशासन, पारदर्शिता तथा प्रभावकारी सेवा प्रवाहलाई प्राथमिकतामा राखेर काम गर्ने बताएका छन् । साथै जनप्रतिनिधि, कर्मचारी र स्थानीय समुदायबीच समन्वय तथा सहकार्यलाई थप प्रभावकारी बनाउने प्रतिबद्धता जनाएका छन् ।
