वीरगंज । नेकपा एमालेका नेता एवं पर्साको जगरनाथपुर गाउँपालिकाका पूर्वअध्यक्ष जालिम मियाँका कान्छा छोरा जाफिर मियाँ मन्सुरी पनि पक्राउ परेका छन् । ज्यानसम्बन्धी कसुर तथा सार्वजनिक न्यायविरुद्धको कसुरमा प्रहरीले मन्सुरीलाई बुधबार वीरगंजबाट पक्राउ गरेको हो ।
जगरनाथपुर गाउँपालिका–५ घर भई हाल वीरगंज महानगरपालिका–१३ मुर्लीमा बस्दै आएका करिब ४० वर्षीय मन्सुरीलाई बुधबार दिउँसो पक्राउ गरिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लले जानकारी दिए । मन्सुरी भैंसी तथा पाडा व्यापारी हुन् ।
प्रहरीका अनुसार मन्सुरीमाथि जगरनाथपुर गाउँपालिका–४ घर भएकी आफ्नी सालीको हत्या घटनामा संलग्न रहेको आरोप छ । यसअघि सोही घटनामा उनका दाजु नासिर अहमदलाई प्रहरीले पक्राउ गरिसकेको छ । नासिर अहिले प्रहरी हिरासतमा छन् ।
२०७८ साल असोज २१ गते जाफिरकी अविवाहित सालीको शव प्रहरीलाई जानकारी नदिई वीरगंज–१३ मुर्लीस्थित कब्रस्तानमा गाड्ने क्रममा प्रहरीले नियन्त्रणमा लिएको थियो । शव गाड्ने क्रममा नासिर, जाफिरलगायतका व्यक्तिहरू संलग्न रहेको आरोप लागेको थियो ।
प्रहरीका अनुसार ती युवतीमाथि जबर्जस्ती करणी भएपछि अत्यधिक रक्तश्राव भएर सिकिस्त अवस्थामा गाउँकै क्लिनिकमा उपचारका क्रममा मृत्यु भएको थियो । त्यसपछि उनको शव वीरगंज ल्याएर गुपचुप रूपमा कब्रस्तानमा गाड्ने प्रयास गरिएको आरोप छ ।
घटनाको अनुसन्धान गर्दै आएको प्रहरीले करिब पाँच वर्षपछि अहिले नासिर र जाफिरलाई पक्राउ गरेको हो । पाँच वर्षअघि राजनीतिक पहुँचका कारण घटनाको अनुसन्धान अगाडि नबढाइएको आरोपसमेत लाग्दै आएको थियो । प्रहरीले भने अहिले घटनाको अनुसन्धानलाई पुनः अगाडि बढाएको जनाएको छ ।
घटनामा संलग्न अन्य आरोपितहरू फरार रहेको र उनीहरूको खोजी भइरहेको प्रहरीले जनाएकाे छ ।
