वीरगञ्ज । पर्सामा १९ क्विन्टल बोइलर कुखुरा र ५ लाख रुपैयाँ लुटिएको भन्ने आरोप निराधार रहेको भन्दै पर्सा ग्रामीण कुखुरा व्यवसाय सङ्घले खण्डन गरेको छ।
आर्या फ्रेस हाउस एन्ड सप्लायर्सका सञ्चालक फिरोज अन्सारीले धोबिनी गाउँपालिका–३, गुलरियास्थित क्यामुदिन पोल्ट्री फर्मका सञ्चालक क्यामुदिन मियाँले आफ्ना चालकबाट कुखुरा र रकम नियन्त्रणमा लिएको आरोप लगाउँदै बुधबार पत्रकार सम्मेलन गर्नुभएको थियो।
उक्त आरोपको खण्डन गर्दै सङ्घले बिहीबार जिल्ला समन्वय समिति पर्साको परिसरमा पत्रकार सम्मेलन गरी घटना लुटपाट नभएको दाबी गरेको हो।
सङ्घका अध्यक्ष देवेन्द्रप्रसाद आजादका अनुसार क्यामुदिन मियाँले अन्सारीबाट कुखुरा खरिदबापत करिब साढे ६ लाख रुपैयाँ भुक्तानी लिन बाँकी थियो। पटक–पटक रकम माग्दा पनि भुक्तानी नभएपछि व्यवसायी तथा किसानहरूले अन्सारीको कुखुरा बोकेको गाडी रोकेको उहाँको दाबी छ।
आजादले कुखुरा नियन्त्रणमा लिइएको स्वीकार गर्दै रकम असुल गर्ने उद्देश्यले गाडी रोकिएको बताए। उहाँका अनुसार अन्सारीमाथि आफू, अन्य कुखुरा व्यवसायी तथा दाना व्यवसायीको गरी २५ लाख रुपैयाँभन्दा बढी रकम भुक्तानी गर्न बाँकी रहेको छ।
सङ्घले अध्यक्ष आजादको करिब १५ लाख, बहुदरमाईस्थित सोनम फ्रेस हाउसका सञ्चालक अनिलप्रसाद यादवको ९४ हजार, वीरगञ्ज–२७ घुर्मीका दाना व्यवसायी मनोज पटेलको २ लाख ५० हजार, वीरगञ्ज–१९ विन्दवासिनीका अनिश सप्लायर्सका सञ्चालक रामअयोध्या कलवारको ४० हजार तथा आसवारीका पिन्टु पटेलको २ लाख रुपैयाँलगायत रकम अन्सारीबाट लिन बाँकी रहेको दाबी गरेको छ।
सङ्घका अनुसार रकम भुक्तानीका लागि पटक–पटक सम्पर्क गर्दा अन्सारी सम्पर्कमा नआएपछि व्यवसायी तथा किसानले कुखुरा बोकेको गाडी रोकेका थिए। गाडी रोक्नु र कुखुरा नियन्त्रणमा लिनु कानुनी प्रक्रियाअनुसार उचित नभए पनि घटनाबारे प्रहरीलाई जानकारी गराइएको सङ्घको भनाइ छ।
सङ्घका अनुसार गाडी बुझाउन जानकीटोला प्रहरीलाई आग्रह गरिएको भए पनि प्रहरीले नबुझेपछि चालकले क्यामुदिनको फर्मअगाडि गाडी पार्क गरेर वीरगञ्ज फर्किएका थिए।
घटनाबारे दुवै पक्षले प्रहरीमा उजुरी दिएका छन्। विवाद समाधानका लागि पोखरिया प्रहरीको रोहबरमा दुवै पक्षबीच छलफल गराउने तयारी भइरहेको सङ्घले जनाएको छ।
