वीरगञ्ज । पर्साको बिन्दवासिनी गाउँपालिका–१, गर्दौलस्थित ज्ञानसागर दलित प्राथमिक विद्यालयमा अध्ययनरत आर्थिक रूपमा विपन्न परिवारका बालबालिकालाई होसेक प्रतिष्ठान नेपालले कपडा सहयोग गरेको छ।
प्रतिष्ठानले बिहीबार विद्यालयमा कार्यक्रम आयोजना गरी ११२ जना विद्यार्थीलाई एक–एक थान टिसर्ट र पाइन्ट वितरण गरेको हो। विद्यालयका प्रधानाध्यापक अकलेस जयसवालका अनुसार अभिभावकहरूको उपस्थितिमा विद्यार्थीलाई कपडा वितरण गरिएको थियो।
आर्थिक अवस्था कमजोर भएका परिवारका बालबालिकालाई विद्यालय पोसाकका रूपमा कपडा उपलब्ध गराउँदा उनीहरूलाई राहत पुग्ने विद्यालयले जनाएको छ। सहयोगले विद्यार्थीलाई अध्ययनमा थप सहज वातावरण बनाउनसमेत मद्दत पुग्ने अपेक्षा गरिएको छ।
कपडा वितरण कार्यक्रममा होसेक प्रतिष्ठान नेपालका प्रतिनिधि कैलाश लामा र जेनी कार्कीसहित विद्यालयका शिक्षक–शिक्षिका, अभिभावक तथा अन्यको सहभागिता रहेको प्रधानाध्यापक जयसवालले जानकारी दिए।
