वीरगंज । मधेश प्रदेशका विद्यार्थी, युवा तथा नागरिकहरूको तर्फबाट मधेश विश्वविद्यालयका उपकुलपति प्रो. डा. दीपक बहादुर शाक्यलाई विश्वविद्यालयको शैक्षिक विस्तार र सुधारका लागि ज्ञापनपत्र बुझाइएको छ ।
प्रभाकर साहको नेतृत्वमा पेश गरिएको ज्ञापनपत्रमा मधेश विश्वविद्यालय स्थापना भएको चार वर्ष बितिसक्दा पनि पूर्ण विकसित प्रादेशिक विश्वविद्यालयको रूपमा स्थापित हुन नसकेको उल्लेख गरिएको छ । विश्वविद्यालय हाल व्यवस्थापन, सार्वजनिक प्रशासन तथा कानुनसम्बन्धी सीमित कार्यक्रममै केन्द्रित रहेको भन्दै विज्ञान, इन्जिनियरिङ, सूचना प्रविधि तथा अन्य प्राविधिक विषयहरूको अभावप्रति चिन्ता व्यक्त गरिएको छ ।
ज्ञापनपत्रमा विश्वविद्यालयले बहुविषयक शैक्षिक संस्थाको रूपमा विकास हुनुपर्ने आवश्यकता औंल्याउँदै आधुनिक रोजगारी बजारमा माग भएका विषयहरू तत्काल सञ्चालन गर्नुपर्ने माग गरिएको छ । साथै, विश्वविद्यालयको शैक्षिक विस्तार, कार्यक्रम सञ्चालन तथा स्रोत व्यवस्थापनमा पारदर्शिता र स्वायत्तता सुनिश्चित गर्नुपर्ने उल्लेख छ ।
ज्ञापनपत्रमार्फत आगामी शैक्षिक सत्रभित्र विज्ञान, इन्जिनियरिङ, बीएस्सी, बीटेक तथा सूचना प्रविधिसम्बन्धी कार्यक्रम सञ्चालनका लागि स्पष्ट कार्ययोजना सार्वजनिक गर्न, शिक्षक भर्ती र स्रोत बाँडफाँडमा पारदर्शिता कायम गर्न तथा पूर्वाधार विकास र नयाँ कार्यक्रम सञ्चालनका लागि निश्चित समयसीमा घोषणा गर्न माग गरिएको छ ।
ज्ञापनपत्रमा विश्वविद्यालयलाई व्यवस्थापन, प्रशासन र कानुनमा मात्र सीमित नराखी प्रदेशस्तरीय वास्तविक बहुविषयक विश्वविद्यालयको रूपमा रूपान्तरण गर्न आग्रह गरिएको छ ।
प्रभाकर साहले मधेश विश्वविद्यालय सम्पूर्ण प्रदेशका युवाका लागि उत्कृष्टता र गर्वको केन्द्र बन्न सक्ने विश्वास व्यक्त गर्दै ज्ञापनपत्रमा उठाइएका विषयमा विश्वविद्यालय प्रशासनले सकारात्मक र समयमै पहल गर्ने अपेक्षा व्यक्त गरेका छन् ।
