वीरगंज । नेपाल प्रहरी प्रदेश कार्यालय, वीरगंजमा कार्यरत प्रहरी सहायक निरीक्षक (असई) रवि कुमार साह तेलीको असामयिक निधन भएको छ । बहुदरमाई नगरपालिका–६ निवासी २८ वर्षीय तेलीको बिहीबार बिहान उपचारका क्रममा निधन भएको मधेश प्रदेश प्रहरी कार्यालयले जनाएको छ ।
कार्यालयका अनुसार हृदयसम्बन्धी समस्याबाट पीडित रहेका तेलीको उपचार भइरहेका बेला मृत्यु भएको हो । उनी विपद् व्यवस्थापन कार्यालय, जनकपुरमा दरबन्दी रहे पनि केही समयदेखि काजमा नेपाल प्रहरी प्रदेश कार्यालय, वीरगंजमा कार्यरत थिए ।
तेलीको निधनप्रति मधेश प्रदेश प्रहरी कार्यालयले गहिरो दुःख व्यक्त गर्दै भावपूर्ण श्रद्धाञ्जली अर्पण गरेको छ । कार्यालयले जारी गरेको श्रद्धाञ्जली सन्देशमा स्वर्गीय तेलीलाई कर्मठ र राष्ट्रप्रति समर्पित प्रहरीकर्मीको रूपमा स्मरण गरिएको छ ।
प्रदेश प्रहरी कार्यालयले दिवंगत आत्माको चिरशान्तिको कामना गर्दै शोकसन्तप्त परिवारजनप्रति हार्दिक समवेदना व्यक्त गरेको छ । साथै, यस दुःखद घडीमा परिवारलाई धैर्य धारण गर्ने शक्ति प्राप्त होस् भन्ने कामना समेत गरेको छ ।
