वीरगंज । जिल्ला ट्राफिक प्रहरी कार्यालय वीरगंज, पर्साका प्रमुख प्रहरी निरीक्षक युवराज कटवालको सरुवा भएको छ । प्रहरी प्रधान कार्यालयले बुधबार राति ५०९ जना प्रहरी निरीक्षकहरूको एकैपटक गरेको सरुवाअन्तर्गत कटवालको पनि सरुवा गरिएको हो ।
सरुवा सूचीअनुसार कटवाललाई अपराध अनुसन्धान विद्यालय प्रशासन शाखा, महाराजगञ्ज काठमाडौंमा खटाइएको छ । उनको स्थानमा काठमाडौं उपत्यका प्रहरी कन्ट्रोल रुम समन्वय शाखामा कार्यरत प्रहरी निरीक्षक दीपेन्द्र श्रेष्ठ जिल्ला ट्राफिक प्रहरी कार्यालय वीरगंजको प्रमुखका रूपमा आउने भएका छन् ।
यसैबीच, नेपाल प्रहरी प्रदेश कार्यालय वीरगंजमा कार्यरत तीन जना प्रहरी निरीक्षकहरूको पनि सरुवा भएको छ । प्रदेश कार्यालयको अनुसन्धान योजना शाखामा कार्यरत प्रहरी निरीक्षक अनुप गुरुङलाई जिल्ला प्रहरी कार्यालय नुवाकोटको अपराध नियन्त्रण तथा अनुसन्धान शाखामा पठाइएको छ ।
त्यस्तै, प्रदेश कार्यालयअन्तर्गत पोलिग्राफ एकाइ वीरगंजमा कार्यरत प्रहरी निरीक्षक दीपेन्द्र कुमार यादवको सरुवा मधेश प्रदेश प्रहरी गण, जनकपुरमा भएको छ भने कर्मचारी प्रशासन शाखा वीरगंजमा कार्यरत प्रहरी निरीक्षक श्यामसुन्दर यादवलाई जिल्ला प्रहरी कार्यालय काभ्रेपलाञ्चोकको अपराध नियन्त्रण तथा अनुसन्धान शाखामा सरुवा गरिएको प्रहरी प्रधान कार्यालयले जनाएको छ ।
