काठमाडौं । सामाजिक सञ्जालमार्फत ग्राहक खोजी गरी होटलहरूमा यौनजन्य अनैतिक गतिविधि (इलीगल इस्कर्ट) सञ्चालन गर्ने गिरोहमा संलग्न १६ जनालाई नेपाल प्रहरीले पक्राउ गरेको छ ।
प्रहरीका अनुसार फेसबुक, ह्वाट्सएप लगायतका सामाजिक सञ्जाल प्रयोग गरी युवतीहरूको फोटो तथा भिडियो देखाएर ग्राहकसँग मोलमोलाइ गर्ने, भेटघाटको सेटिङ मिलाउने तथा ट्याक्सी र निजी सवारी साधनमार्फत गौशाला क्षेत्रको शम्भुमार्ग र बत्तीसपुतली आसपासका विभिन्न होटलहरूमा पुर्याई यौनजन्य गतिविधि गराउने कार्यमा उनीहरू संलग्न रहेको प्रारम्भिक अनुसन्धानबाट खुलेको छ ।
पक्राउ पर्नेहरूमा मकवानपुर मनहरी गाउँपालिका–२ घर भई काठमाडौं बस्दै आएका ३३ वर्षीय होटल सञ्चालक विकास भुलन, सर्लाही लालबन्दी नगरपालिका–१४ का ३४ वर्षीय सुनिल तामाङ, मकवानपुर बकैया गाउँपालिका–८ का २८ वर्षीय बिबेक स्याङ्तान तथा काठमाडौं महानगरपालिका–९ शम्भुमार्ग बस्ने राजकुमार गौतम रहेका छन् ।
यस्तै पेमा लामा, अन्जली धिमाल, लक्ष्मी मगर, सम्झना थापा, एलिना तामाङ, कमला माया लामा, फुर्वा माया तामाङ, शिवानी सुनार, रोशनी लामा, सपना बम, उमा देवी गुरुङ र प्रिया तामाङलाई पनि प्रहरीले नियन्त्रणमा लिएको जनाएको छ ।
प्रहरीले उक्त गिरोहले सामाजिक सञ्जाललाई माध्यम बनाएर संगठित रूपमा अवैध गतिविधि सञ्चालन गर्दै आएको आशंकामा अनुसन्धान अघि बढाएको जनाएको छ । घटनाबारे थप अनुसन्धान जारी रहेको नेपाल प्रहरीले जानकारी दिएको छ ।
