वीरगंज । पर्साको जगरनाथपुर गाउँपालिका वडा नं. ५ मसिहानीस्थित छठघाट निर्माण कार्यको मंगलबार गाउँपालिका अध्यक्ष श्रीकान्त प्रसाद यादवले शिलान्यास गरेका छन् ।
शिलान्यास कार्यक्रममा बोल्दै अध्यक्ष यादवले छठ पर्व नेपाली समाजको आस्था, संस्कृति र पहिचानसँग जोडिएको महत्वपूर्ण पर्व भएको उल्लेख गर्दै यसको संरक्षण तथा श्रद्धालु भक्तजनको सुविधालाई ध्यानमा राखेर छठघाट निर्माण कार्य अघि बढाइएको बताए ।
उनले विकास, संस्कृति र जनभावनालाई समान रूपमा सम्मान गर्दै जगरनाथपुर गाउँपालिकाको समृद्धिका लागि स्थानीय सरकार निरन्तर प्रतिबद्ध रहेको बताए । साथै, निर्माण कार्यलाई सफल बनाउन सहयोग गर्ने सम्पूर्ण जनप्रतिनिधि, कर्मचारी, स्थानीयवासी तथा सरोकारवालाप्रति धन्यवाद व्यक्त गरे ।
मधेश प्रदेश सरकारको सहयोगमा जगरनाथपुर गाउँपालिकाले निर्माण गर्न लागेको उक्त छठघाटको निर्माण कार्य आगामी असार १५ गतेभित्र सम्पन्न गर्ने लक्ष्य राखिएको गाउँपालिकाले जनाएको छ ।
स्थानीयवासीले छठघाट निर्माण भएपछि छठ पर्वलगायत अन्य धार्मिक तथा सांस्कृतिक गतिविधि सञ्चालन गर्न सहज हुने विश्वास व्यक्त गरेका छन् ।
