वीरगंज । राष्ट्रिय स्वतन्त्र पार्टी (रास्वपा) पर्सा क्षेत्र नं. ४ को संयोजकमा जितेन्द्र मिश्रा निर्वाचित भएका छन् । जिल्ला सभापति हरि पन्त पक्षका उम्मेदवार मिश्राले ५२ मत प्राप्त गर्दै विजय हासिल गरेका हुन् ।
उनका निकटतम प्रतिद्वन्द्वी जगदीश प्रसादले १८ मत प्राप्त गरेका थिए । जगदीश पर्सा क्षेत्र नं. ४ का प्रतिनिधिसभा सदस्य टेकबहादुर शाक्य पक्षका उम्मेदवार थिए । मिश्रा निर्वतमान क्षेत्रिय सभापति पनि हुन् ।
क्षेत्रीय नेतृत्व चयनका लागि सम्पन्न निर्वाचनमा मिश्राको नेतृत्वको प्यानलले पुरै पदमा जित हासिल गरेको छ । उपसंयोजक (क) पदमा प्रधुमनकुमार गौतम ४९ मतसहित निर्वाचित भए भने उपसंयोजक (ख) मा प्रवेज अहमद ३८ मतसहित विजयी भएका छन् ।
उपसंयोजक पदका अन्य उम्मेदवार कृष्णमोहन प्रसाद यादवले १९ मत तथा रामनाथ प्रसाद चौरसियाले १५ मत प्राप्त गरेका थिए ।
त्यसैगरी सदस्य पदमा विकीकुमार यादव निर्वाचित भएका छन् ।
निर्वाचन परिणामसँगै पर्सा क्षेत्र नं. ४ मा मिश्रा पक्षको संगठनात्मक प्रभाव थप बलियो बनेको विश्लेषण गरिएको छ । सांंसद शाक्य पक्ष कमजोर भएको छ ।
