वीरगंज । “हो, हामी क्षयरोग अन्त्य गर्न सक्छौं : देशको नेतृत्वमा, हाम्रो साझा प्रयासबाट सम्भव छ ।” भन्ने नारासहित सञ्चालन गरिएको ‘क्षयरोग मुक्त जगरनाथपुर अभियान’ अन्तर्गत जगरनाथपुर गाउँपालिकामा क्षयरोगको जोखिम समूह लक्षित खोजपडताल कार्यक्रम सम्पन्न भएको छ ।
जगरनाथपुर गाउँपालिकाको स्वास्थ्य शाखाको आयोजनामा जगरनाथपुर स्वास्थ्य चौकीमा आयोजित एआई (कृत्रिम बुद्धिमत्ता) प्रविधियुक्त एक्स–रे तथा माइक्रोस्कोपी शिविर मार्फत क्षयरोगको प्रारम्भिक पहिचान तथा परीक्षण सेवा प्रदान गरिएको थियो ।
शिविरमा क्षयरोगको जोखिममा रहेका व्यक्तिहरूको स्वास्थ्य परीक्षण, छातीको एक्स–रे तथा आवश्यक प्रयोगशाला परीक्षण गरिएको स्वास्थ्यकर्मी अशोक पटेलले जानकारी दिए । उनका अनुसार शिविरबाट एक सय ८३ जना लाभान्वित भएका छन् ।
कार्यक्रमको उद्देश्य समुदायस्तरमै क्षयरोगका सम्भावित बिरामीको पहिचान गरी समयमै उपचारको पहुँच सुनिश्चित गर्नुका साथै क्षयरोग नियन्त्रण तथा उन्मूलन अभियानलाई प्रभावकारी बनाउनु रहेको गाउँपालिका स्वास्थ्य संंयाेेजक प्रभेन्द्र साहले वताए ।
जगरनाथपुर गाउँपालिकाले स्थानीय तहबाटै क्षयरोग अन्त्यका लागि सचेतना, खोजपडताल तथा उपचार सेवालाई थप सशक्त बनाउँदै लैजाने प्रतिबद्धता व्यक्त गरेको छ ।
स्वास्थ्यकर्मीहरूले क्षयरोगका लक्षण देखिएमा ढिलाइ नगरी स्वास्थ्य संस्थामा सम्पर्क गर्न समेत सर्वसाधारणलाई आग्रह गरेका छन्।
