वीरगंज । २५ वर्षअघि भएको कर्तव्य ज्यान घटनामा संलग्न फरार अभियुक्तलाई पर्सा प्रहरीले पक्राउ गरेको छ ।
जिल्ला प्रहरी कार्यालय पर्साका अनुसार मिति २०५८ फागुन २६ गते पर्साको साविक धौरे गाविस–८ (हाल पकाहा मैनपुर गाउँपालिका–१) निवासी २६ वर्षीया रावडी भन्ने रीना देवीको हत्या प्रकरणमा संलग्न अभियुक्तलाई पक्राउ गरिएको हो ।
घरायसी विवादका कारण रीना देवीको घाँटी थिची हत्या गरिएको थियो । घटनापछि फरार रहेका अभियुक्तलाई विशेष सूचनाका आधारमा खटिएको प्रहरी टोलीले साेमबार बिहान करिब ७ बजे आफ्नै घरमा लुकिछिपी बसिरहेको अवस्थामा पक्राउ गरेको जनाएको छ ।
पक्राउ पर्नेमा पर्साको साविक धौरे गाविस–८ (हाल पकाहा मैनपुर गाउँपालिका–१) निवासी ५० वर्षीय काशी महतो चाई भन्ने काशीप्रसाद चौहान रहेका छन् ।
प्रहरीले कर्तव्य ज्यान (ज्यान सम्बन्धी कसुर) मुद्दामा पर्सा जिल्ला अदालतबाट तीन दिनको म्याद थप अनुमति लिई थप अनुसन्धान कार्य अघि बढाइएको जनाएको छ ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले घटनाको लामो समयपछि अभियुक्त पक्राउ परेकाले अनुसन्धानलाई निष्कर्षमा पुर्याउने प्रक्रिया अगाडि बढाइएको जानकारी दिएका छन् ।
