वीरगंज । मधेश प्रदेश सरकारको वन तथा वातावरण मन्त्रालयले नेपाली कांग्रेस पर्सा क्षेत्र नं. ४ का सचिव बलिष्टर अहमदलाई जिल्ला वन पैदावार आपूर्ति समिति पर्साको अध्यक्ष पदमा नियुक्त गरेको छ ।
वन तथा वातावरण मन्त्रालयले जारी गरेको नियुक्ति पत्रअनुसार मन्त्रीस्तरको मिति २०८३ जेठ १९ गतेको निर्णयबमोजिम प्रदेश वन ऐन, २०७७ को दफा ९४ अनुसार अहमदलाई उक्त पदमा नियुक्त गरिएको हो ।
मन्त्रालयका महाशाखा प्रमुख सूर्य प्रसाद मैनालीद्वारा हस्ताक्षरित पत्रमा अध्यक्षको जिम्मेवारी सम्हाल्ने क्रममा निष्पक्ष, इमान्दार तथा उत्तरदायी भई प्रचलित कानुनबमोजिम कार्य सम्पादन गर्ने विश्वास व्यक्त गरिएको छ । साथै अध्यक्ष पदमा नियुक्त भएकोमा मन्त्रालयले अहमदलाई बधाई तथा शुभकामना समेत दिएको छ ।
बलिष्टर अहमद नेपाली कांग्रेस पर्सा क्षेत्र नं. ४ का सचिवका रूपमा सक्रिय रहँदै आएका छन् । उनको नियुक्तिसँगै जिल्ला वन पैदावार आपूर्ति समिति पर्साको नेतृत्वले वन पैदावारको व्यवस्थापन, वितरण तथा संरक्षणसम्बन्धी कार्यलाई थप प्रभावकारी बनाउने अपेक्षा गरिएको छ ।
नियुक्तिपत्रको बोधार्थ प्रदेश वन निर्देशनालय जनकपुरधाम, डिभिजन वन कार्यालय पर्सा तथा जिल्ला वन पैदावार आपूर्ति समिति पर्सालाई समेत पठाइएको मन्त्रालयले जनाएको छ ।
