कोल्भी । “घरदैलोमा डाक्टर” कार्यक्रमअन्तर्गत प्रभु हस्पिटल, वीरगञ्जले बाराको कोल्भी नगरपालिका–८ नयाँबस्तीमा निःशुल्क स्वास्थ्य शिविर सञ्चालन गरेको छ ।
शिविरमा वरिष्ठ हाडजोर्नी तथा नसा रोग विशेषज्ञ डा. शाश्वत साहले हाडजोर्नीसम्बन्धी परीक्षण गर्नुका साथै नितम्ब तथा घुँडा जोर्नी प्रत्यारोपणसम्बन्धी परामर्श प्रदान गरेका थिए । शिविरमा सहभागीहरूलाई निःशुल्क औषधि वितरण तथा सुगर परीक्षणसमेत गरिएको थियो ।
त्यसैगरी, वीरगञ्ज सामुदायिक आँखा अस्पतालको सहकार्यमा आँखा विशेषज्ञ महेश सिंह धामीले निःशुल्क आँखा परीक्षण तथा औषधि वितरण गरेका थिए । आँखा परीक्षणका क्रममा मोतियाबिन्दु पहिचान भएका बिरामीहरूको शल्यक्रिया तत्कालै गरिने जानकारी दिइएको छ ।
शिविरमा ११० महिला र ९० पुरुषसहित वृद्धवृद्धा, बालबालिका, अशक्त तथा असहाय गरी कुल २०० जनाले स्वास्थ्य सेवा प्राप्त गरेका छन् ।
कार्यक्रम प्रमुख दिलीप राज कार्कीले अस्पतालसम्म पुग्न समय वा सुविधा नभएका नागरिकलाई घरदैलोमै स्वास्थ्य सेवा उपलब्ध गराउने उद्देश्यले कार्यक्रम सञ्चालन गरिएको बताए ।
वडा अध्यक्ष अनुप सुवेदीले गाउँमै विशेषज्ञ चिकित्सकबाट स्वास्थ्य परीक्षण र निःशुल्क औषधि वितरण भएकोमा खुसी व्यक्त गर्दै यस्ता कार्यक्रमले स्थानीय बासिन्दालाई ठूलो राहत पुगेको बताए ।
कार्यक्रमका वडा संयोजक विशाल ठकुरीले स्वास्थ्य संस्था र स्वास्थ्यकर्मीहरूले समाजसेवामूलक कार्यक्रमलाई निरन्तरता दिनुपर्ने आवश्यकता औँल्याए ।
स्थानीयवासीको उल्लेखनीय सहभागिता रहेको उक्त शिविरले ग्रामीण क्षेत्रमा स्वास्थ्य सेवाको पहुँच विस्तार गर्न महत्वपूर्ण योगदान पुर्याएको आयोजकले जनाएको छ ।
