काठमाडौं । आम जनता पार्टी (आजपा)ले आगामी आन्दोलनको घोषणा तथा तयारीबारे छलफल गर्न केन्द्रीय कमिटी बैठक आह्वान गरेको छ । पार्टी प्रवक्ता सुभाष साहका अनुसार आगामी आइतबार असोज १८ गते काठमाडौंको कमलादीस्थित नेपाल प्रज्ञा प्रतिष्ठानमा केन्द्रीय कमिटीको बैठक बस्नेछ ।
बैठकले पार्टीको आगामी कार्ययोजनाको रूपरेखा तय गर्नुका साथै आन्दोलनको तयारीबारे महत्वपूर्ण निर्णय गर्ने जनाइएको छ । बैठकमा सरकारका कामकारबाहीको समीक्षा गर्दै अध्यक्ष प्रभु साहले राजनीतिक प्रतिवेदन प्रस्तुत गर्ने कार्यक्रम रहेको प्रवक्ता साहले बताए ।
बैठकमा समसामयिक राजनीतिक विषयसँगै ‘विदेशी एजेण्टबाट देश बचाउने’, सैनिक हस्तक्षेपबाट लोकतन्त्र जोगाउने तथा ‘फेक शासन’को अन्त्य गर्ने विषयमा छलफल हुने आजपाले जनाएको छ ।
त्यसैगरी मूल्यवृद्धि, कालोबजारी, कर आतंक, मलखादको अभाव, बाढीपीडितको पुनर्स्थापना तथा पुनर्निर्माणलगायत जनसरोकारका विषयमा समेत छलफल गरी आवश्यक निर्णय गरिने बताइएको छ ।
