वीरगंज । राष्ट्रिय स्वतन्त्र पार्टी (रास्वपा) पर्साको जिल्ला अधिवेशनअघि प्रतिनिधि छनोटको विषयलाई लिएर पार्टीभित्रको विवाद चर्किँदा कार्यकर्ताबीच हानाहान भएको छ । घटनापछि अधिवेशनको निर्वाचन प्रक्रिया अस्थायी रूपमा स्थगित गरिएको छ ।
आइतबार हुने जिल्ला अधिवेशनका लागि वीरगंज–९ स्थित होटल गेट वे वीरगंजमा शनिबार निर्वाचन प्रक्रिया चलिरहेका बेला पार्टीका दुई पक्षबीच विवाद बढ्दै गएपछि हानाहानको अवस्था सिर्जना भएको हो ।
प्रतिनिधि चयन प्रक्रियामा असन्तुष्टि जनाउँदै दुई पक्षबीच भएको झडपमा वीरगंज–१४ निवासी ३८ वर्षीय महादेवप्रसाद कुर्मी, वीरगंज–१ निवासी ४० वर्षीय वीरेन्द्र साह र वीरगंज–२ निवासी ४० वर्षीय रन्दिप श्रीवास्तव घाइते भएका छन् । घाइतेहरूको वीरगंजस्थित नारायणी अस्पतालमा उपचार भइरहेको छ ।
घटनामा संलग्न एक जनालाई प्रहरीले नियन्त्रणमा लिएको छ ।
यसअघि शनिबार दिउँसो पार्टी सदस्य महादेवप्रसाद कुर्मी, केन्द्रीय महाधिवेशन प्रतिनिधि सुधिर पटेल, क्षेत्रीय सभापति राम आर्यसहितको समूहले जिल्ला अधिवेशन स्थगित गर्न माग गर्दै मधेश प्रदेश उपसभापति तथा निर्वाचन समिति सदस्य राधिका न्यौपानेलाई ज्ञापनपत्र बुझाएका थिए ।
उनीहरूले जिल्लाका १४ वटै पालिका तथा विभिन्न विभागबाट प्रतिनिधि चयन गर्ने क्रममा जिल्ला सभापति तथा पर्सा क्षेत्र नम्बर १ का सांसद हरि पन्त पक्षले पार्टीको विधान र पद्धति विपरीत एकलौटी रूपमा आफ्ना निकट व्यक्तिलाई प्रतिनिधि बनाएको आरोप लगाएका छन् ।
ज्ञापनपत्र प्राप्त भएपछि निर्वाचन समितिले करिब दुई घण्टाका लागि निर्वाचन प्रक्रिया स्थगित गरेको थियो । तर प्रक्रिया पुनः सुरु भएपछि निर्वाचन कार्यालय रहेको होटल परिसरमै दुई पक्षबीच विवाद चर्किएको थियो ।
प्रत्यक्षदर्शीका अनुसार होटलभित्र सुरु भएको विवाद सडकसम्म पुगेको थियो । झडपका क्रममा केही व्यक्तिले एकअर्कामाथि हेल्मेटसमेत प्रहार गरेका थिए । अवस्था नियन्त्रणबाहिर जान थालेपछि घटनास्थलमा पुगेको प्रहरीले लाठीचार्ज गरी भिड तितरबितर पारेको थियो ।
निर्वाचन समितिका संयोजक डा. नन्दन यादवले कार्यकर्ताबीच झडप भएपछि निर्वाचन प्रक्रिया तत्कालका लागि स्थगित गरिएको जानकारी दिए । उनका अनुसार अब निर्वाचन प्रक्रिया आइतबार बिहान ८ बजेदेखि पुनः सञ्चालन गरिनेछ ।
रास्वपा पर्साभित्र पालिका अधिवेशनदेखि नै देखिएको आन्तरिक विवाद जिल्ला अधिवेशनको पूर्वसन्ध्यामा थप सतहमा आएको देखिएको छ । पर्सा क्षेत्र नम्बर १ का सांसद तथा जिल्ला सभापति हरि पन्तले अधिवेशन बिथोल्ने उद्देश्यले घटना गराइएको दाबी गरेका छन् । उनले घटनापछि निर्वाचन प्रक्रिया आइतबार बिहानसम्मका लागि स्थगित गरिएको बताए ।
पर्सामा रास्वपाभित्र हाल दुई स्पष्ट समूह देखिएका छन् । एक समूहको नेतृत्व संस्थापक जिल्ला सभापति तथा सांसद हरि पन्तले गर्दै आएका छन् भने अर्को समूहमा सांसदहरू सुशील साह कानु, रमाकान्त चौरसिया र टेकबहादुर शाक्य रहेका छन् । साे समुहकाे नेतृत्व सुधिर पटेलले गर्दै आएका छन् ।
रास्वपा पर्साको जिल्ला सभापति पदका लागि हालसम्म सांसद हरि पन्त र सांसद सुशील साह कानु मुख्य आकांक्षीका रूपमा देखिएका छन्। आन्तरिक प्रतिस्पर्धा र प्रतिनिधि चयन विवादका कारण अधिवेशनअघि नै पार्टीभित्रको गुटगत संघर्ष सार्वजनिक रूपमा छताछुल्ल भएको छ।
