वीरगंज । पर्साको जगरनाथपुर गाउँपालिकालाई पूर्ण खोप दिगोपना सुनिश्चितता गाउँपालिका घोषणा गरिएको छ । राष्ट्रिय खोप कार्यक्रमअन्तर्गत नियमित खोप सेवाको प्रभावकारी कार्यान्वयन, लक्षित बालबालिकाको शतप्रतिशत खोप सुनिश्चितता तथा खोप सम्बन्धी मापदण्ड पूरा भएपछि गाउँपालिकालाई पूर्ण खोप दिगोपना सुनिश्चितता घोषणा गरिएको हो ।
गाउँपालिकाको वडा नं. ५ मसिहानीस्थित कृषि तथा पशुपन्छी सेवा केन्द्रमा आयोजित एक कार्यक्रमबीच गाउँपालिका अध्यक्ष श्रीकान्त प्रसाद यादवले गाउँपालिकालाई पूर्ण खोप दिगोपना सुनिश्चितता घोषणा गरेका हुन् ।
सो अवसरमा राष्ट्रिय खोप कार्यक्रम अन्तर्गत नियमित खोप सुदृढीकरण, सरसफाइ प्रवर्द्धन तथा स्वास्थ्य सेवाको अवस्था सम्बन्धी समीक्षा गरिएको थियो । साथै आगामी दिनमा खोप कार्यक्रमलाई अझ प्रभावकारी बनाउने उद्देश्यले सूक्ष्म योजना अध्यावधिक गोष्ठी समेत सम्पन्न गरिएको गाउँपालिकाका स्वास्थ्यकर्मी अशोक पटेलले जानकारी दिए ।
कार्यक्रममा बोल्दै गाउँपालिका अध्यक्ष यादवले बालबालिकालाई विभिन्न रोगबाट सुरक्षित राख्न खोपको महत्वपूर्ण भूमिका रहेको उल्लेख गर्दै खोप अभियानलाई निरन्तरता दिन सबै सरोकारवालाको सहकार्य आवश्यक रहेको बताए । उनले प्राप्त उपलब्धिलाई दिगो बनाउन स्वास्थ्यकर्मी, जनप्रतिनिधि, महिला स्वास्थ्य स्वयंसेविका तथा अभिभावकहरूको सक्रिय सहभागिता आवश्यक रहेको धारणा राखे ।
गाउँपालिकाकी उपाध्यक्ष बबिता सिंह क्षेत्रीले पूर्ण खोप सुनिश्चितता अभियान सफल बनाउन स्वास्थ्य क्षेत्रका सबै कर्मचारी, स्वयंसेविका तथा स्थानीयवासीको योगदान प्रशंसनीय रहेको बताइन् । उनले आगामी दिनमा पनि स्वास्थ्य तथा सरसफाइका कार्यक्रमलाई प्राथमिकताका साथ अघि बढाइने जानकारी दिइन् ।
कार्यक्रममा प्रमुख प्रशासकीय अधिकृत सन्देश कुमार यादव, गाउँपालिका स्वास्थ्य संयाेजक प्रभेन्द्र साह, विभिन्न वडाका जनप्रतिनिधि, स्वास्थ्य संस्था प्रमुख, स्वास्थ्यकर्मी, महिला स्वास्थ्य स्वयंसेविका तथा गाउँपालिकाका कर्मचारीहरूको उपस्थिति रहेको थियो ।
गाउँपालिकाका अनुसार खोपबाट बचाउन सकिने रोगहरूको नियन्त्रण तथा बालबालिकाको स्वास्थ्य सुरक्षा सुनिश्चित गर्ने उद्देश्यले सञ्चालन गरिएको अभियानअन्तर्गत आवश्यक सूचकहरू पूरा भएपछि जगरनाथपुरलाई पूर्ण खोप दिगोपना सुनिश्चितता गाउँपालिका घोषणा गरिएको हो । यस घोषणासँगै गाउँपालिकाले नियमित खोप कार्यक्रमलाई थप प्रभावकारी र दिगो बनाउने प्रतिबद्धता समेत व्यक्त गरेको छ ।
