वीरगंज । बाराको परवानीपुर गाउँपालिकाका प्रमुख प्रशासकीय अधिकृत मुन्ना कुमार रौनियारको बिदाइ तथा नयाँ प्रमुख प्रशासकीय अधिकृत कृष्णनन्दन रायको स्वागत गरिएको छ ।
संघीय मामिला तथा सामान्य प्रशासन मन्त्रालयले भदौ २९ गते गरेको उपसचिव तथा अधिकृतहरूको सरुवाअन्तर्गत रौनियारको परवानीपुर गाउँपालिकाबाट फेटा गाउँपालिकामा सरुवा भएको थियो । सरुवा भएर फेटा जान लागेका रौनियारलाई परवानीपुर गाउँपालिकाले बिहीबार एक कार्यक्रम आयोजना गरी सम्मानसहित बिदाइ गरेको हो ।
यसैगरी, देवताल गाउँपालिकाका प्रमुख प्रशासकीय अधिकृत रहेका कृष्णनन्दन राय परवानीपुर गाउँपालिकामा हाजिर भएपछि उनको स्वागत गरिएको गाउँपालिकाले जनाएको छ ।
गाउँपालिकामा आयोजित कार्यक्रममा अध्यक्ष रामक्षत्री प्रसाद कुर्मी, उपाध्यक्ष सुगान्धी देवी कनुइन, वडाध्यक्षहरू, कार्यपालिका सदस्य तथा कर्मचारीहरूले रौनियारलाई बिदाइ गर्दै आगामी कार्यकालका लागि शुभकामना दिएका थिए । सोही अवसरमा नवनियुक्त प्रमुख प्रशासकीय अधिकृत रायलाई स्वागत गर्दै गाउँपालिकाको प्रशासनिक तथा विकास निर्माणका कामलाई थप प्रभावकारी बनाउन अपेक्षा व्यक्त गरिएको थियो ।
यसैबीच, रौनियार शुक्रबार फेटा गाउँपालिकाको प्रमुख प्रशासकीय अधिकृतका रूपमा हाजिर भएका छन् । फेटा गाउँपालिकामा पनि शुक्रबार आयोजित कार्यक्रममा रौनियारको स्वागत तथा निवर्तमान प्रमुख प्रशासकीय अधिकृत राकेश ओझाको बिदाइ गरिएको छ ।
