वीरगंज । पर्साको कालिकामाई गाउँपालिकाबाट लागुऔषध मुद्दाका फरार प्रतिवादी पक्राउ परेका छन् । इलाका प्रहरी कार्यालय पोखरियाले अदालतबाट सजाय तोकिएपछि फरार रहेका एक व्यक्तिलाई पक्राउ गरी कारागार चलान गरेको हो ।
पक्राउ पर्नेमा पर्साको कालिकामाई गाउँपालिका–५, बिरञ्चीबर्वा निवासी जितेन्द्र महतो केवट रहेकाे इलाका प्रहरी कार्यालय पाेखरियाका प्रमुख प्रहरी निरीक्षक प्रदिप पाैडलले जानकारी दिए ।
प्रहरी निरीक्षक पौडेलका अनुसार केवटविरुद्ध लागुऔषध सम्बन्धी मुद्दामा अदालतले १ वर्ष कैद र १० हजार रुपैयाँ जरिवानाको फैसला सुनाएको थियो । फैसला कार्यान्वयनबाट बच्न उनी फरार रहँदै आएका थिए ।
फरार प्रतिवादीको खोजतलासका क्रममा प्रहरीले उनलाई पक्राउ गरी आवश्यक कानुनी प्रक्रिया पूरा गरेपछि कैद भुक्तानका लागि वीरगंज कारागार पठाएको जनाएको छ ।
प्रहरीले अदालतबाट सजाय तोकिएर फरार रहेका प्रतिवादीहरूलाई पक्राउ गर्ने अभियानलाई निरन्तरता दिएको समेत जनाएको छ ।
