बारा । कोल्हवी नगरपालिकाको आयोजनामा तथा नेशनल मेडिकल कलेज, वीरगञ्जको क्लिनिकल सहयोगमा कोल्हवी प्राथमिक स्वास्थ्य केन्द्रमा निःशुल्क स्वास्थ्य शिविर सम्पन्न भएको छ । शिविरमा ३६६ जना बिरामीले निःशुल्क स्वास्थ्य परीक्षण, परामर्श तथा उपचार सेवा प्राप्त गरेका छन् ।
शिविरमा जनरल मेडिसिन, स्त्री तथा प्रसूति रोग, हाडजोर्नी तथा नशा रोग र छाला रोगसम्बन्धी विशेषज्ञ सेवाहरू प्रदान गरिएको थियो। स्वास्थ्य सेवा लिन स्थानीय नागरिकहरूको उल्लेखनीय सहभागिता रहेको थियो ।
कार्यक्रममा कोल्हवी नगरपालिकाका जनप्रतिनिधि तथा स्थानीय सरोकारवालाहरूको उपस्थिति रहेको थियो । नेशनल मेडिकल कलेजको तर्फबाट अस्पताल निर्देशक डा. इशरत जहान, प्रमुख सूचना अधिकृत इन्जिनियर प्रदीप कुमार चौधरी, क्वालिटी तथा अपरेशन म्यानेजर ब्रजकिशोर चौधरी, डा. बनारसीलाल कसारी, डा. सन्तोष झा, डा. ओमप्रकाश तथा डा. नीलमणि प्रियदर्शीलगायतको सक्रिय सहभागिता रहेको थियो ।
शिविरकै अवसरमा कोल्हवी नगरपालिका र नेशनल मेडिकल कलेज, वीरगञ्जबीच स्वास्थ्य सेवा सहकार्यसम्बन्धी समझदारीपत्र (एमओयू) मा हस्ताक्षर गरिएको छ । सम्झौतामा नेशनल मेडिकल कलेजका तर्फबाट अस्पताल निर्देशक डा. इशरत जहान र कोल्हवी नगरपालिकाका तर्फबाट नगर प्रमुख रामप्रसाद चौधरीले हस्ताक्षर गरेका छन् ।
सम्झौताअनुसार कोल्हवी नगरपालिकाका नागरिकहरूले नेशनल मेडिकल कलेजमा विभिन्न स्वास्थ्य सेवामा विशेष छुट सुविधा प्राप्त गर्नेछन् । साथै नियमित निःशुल्क स्वास्थ्य शिविर, स्वास्थ्य सचेतना कार्यक्रम तथा अन्य सामुदायिक स्वास्थ्य गतिविधिहरू सञ्चालन गर्न दुवै पक्षबीच सहकार्य गरिने जनाइएको छ ।
“सर्वसुलभ र गुणस्तरीय स्वास्थ्य सेवा प्रत्येक नागरिकसम्म” भन्ने उद्देश्यका साथ आयोजित कार्यक्रमले स्थानीय नागरिकको स्वास्थ्य सेवामा पहुँच विस्तार गर्नुका साथै स्थानीय तह र स्वास्थ्य संस्थाबीचको सहकार्यलाई थप मजबुत बनाउने विश्वास लिइएको छ।
