काठमाडौं । विशेष अदालतले भ्रष्टाचार मुद्दामा दोषी ठहर भएका मधेस प्रदेशका निलम्बित प्रदेशसभा सदस्य सरोजकुमार सिंहलाई ४ वर्ष १ महिना कैद र ३८ लाख ५० हजार १३९ रुपैयाँ जरिवाना गर्ने फैसला गरेको छ।
विशेष अदालतका न्यायाधीश सुदर्शनदेव भट्ट, उमेश कोइराला र विदुर कोइरालाको इजलासले मंगलबार सजाय निर्धारण गर्दै उक्त फैसला सुनाएको हो ।
महोत्तरी निर्वाचन क्षेत्र नम्बर ४ (ख) बाट निर्वाचित सिंहले विभिन्न उपभोक्ता समितिबाट घुसस्वरूप रकम लिएको पुष्टि भएपछि अदालतले उनलाई भ्रष्टाचार निवारण ऐन, २०५९ अनुसार दोषी ठहर गरेको हो ।
अदालतले भ्रष्टाचार निवारण ऐनको दफा ३(१) तथा सोही दफाको खण्ड (छ) बमोजिम कसुरको गम्भीरता हेर्दै ४ वर्ष कैद र बिगो बराबर ३८ लाख ५० हजार १३९ रुपैयाँ जरिवाना हुने ठहर गरेको छ ।
त्यसैगरी, सार्वजनिक पदमा बहाल रहँदा भ्रष्टाचार गरेको ठहर गर्दै ऐनको दफा २४ बमोजिम थप १ महिना कैद सजाय सुनाइएको छ । यससँगै सिंहले कुल ४ वर्ष १ महिना कैद भुक्तान गर्नुपर्ने भएको छ ।
फैसलाअनुसार सिंहले गैरकानुनी रूपमा आर्जन गरेको ३८ लाख ५० हजार १३९ रुपैयाँ जफत हुनेछ। साथै अपराध पीडित संरक्षण ऐन, २०७५ को दफा ४१(३) अनुसार उनीबाट १ लाख ५४ हजार ५ रुपैयाँ क्षतिपूर्ति शुल्क असुल गरी पीडित राहत कोषमा जम्मा गरिने अदालतले जनाएको छ ।
यसअघि विशेष अदालतले जेठ ४ गते सिंहलाई भ्रष्टाचार मुद्दामा दोषी ठहर गरेको थियो भने मंगलबार सजाय निर्धारण गरेको हो । जनता समाजवादी पार्टी (जसपा) सम्बद्ध नेता सिंह हाल उक्त मुद्दाका कारण निलम्बित अवस्थामा छन् ।
