वीरगंज । पर्साको सखुवा प्रसौनी गाउँपालिका–६ लखनपुर चोकबाट प्रहरीले १० वटा भैंसीका पाडोसहित एउटा बोलेरो गाडी र त्यसमा सवार तीन जनालाई नियन्त्रणमा लिएको छ ।
इलाका प्रहरी कार्यालय पोखरियाबाट प्रहरी निरीक्षक प्रदीप पौडेलको कमाण्डमा खटिएको अपरेशन टोलीले आइतबार राति करिब १ः४५ बजे पश्चिमबाट पूर्वतर्फ आउँदै गरेको प्रदेश ०२–०३–००१ च ४००३ नम्बरको बोलेरो गाडी जाँच गर्ने क्रममा बिना बिलबिजकका १० वटा भैंसीका पाडो फेला पारेको थियो ।
प्रहरीले गाडी चालक पर्साको कालिकामाई गाउँपालिका–५ निवासी ३५ वर्षीय विजय शर्मा, धोबिनी गाउँपालिका–३ निवासी ६१ वर्षीय बिकरमा राउत कुर्मी तथा धोबिनी गाउँपालिका–५ निवासी ५५ वर्षीय होडा देवानलाई नियन्त्रणमा लिएको जनाएको छ ।
नियन्त्रणमा लिइएका भैंसीका पाडो, बोलेरो गाडी तथा तीनै जनालाई आवश्यक कानुनी कारबाहीका लागि भन्सार कार्यालय वीरगंज पठाइएको इलाका प्रहरी कार्यालय पोखरियाका प्रहरी निरीक्षक प्रदीप पौडेलले जानकारी दिए ।
