वीरगंज । वातावरण संरक्षण तथा हरियाली प्रवर्द्धन गर्ने उद्देश्यले वीरगंजस्थित वीरगंज न्यूरो एण्ड जेनरल हस्पिटलले वृक्षारोपण कार्यक्रम सम्पन्न गरेको छ।
हस्पिटलको आयोजनामा सम्पन्न कार्यक्रममा विभिन्न प्रजातिका करिब एक हजार बिरुवा रोपिएको अस्पतालले जनाएको छ। खुला क्षेत्रमा गरिएको वृक्षारोपण कार्यक्रममा हस्पिटलका अध्यक्ष तथा वरिष्ठ न्यूरो सर्जन डा. श्याम बाबु पटेल, अस्पतालका कर्मचारी, समाजसेवी, पत्रकार तथा स्थानीयवासीहरूको उल्लेखनीय सहभागिता रहेको थियो।
कार्यक्रममा हस्पिटलका अध्यक्ष तथा वरिष्ठ न्यूरो सर्जन डा. पटेलले वातावरण संरक्षण अहिलेको प्रमुख आवश्यकता भएको उल्लेख गर्दै हरियाली प्रवर्द्धनका लागि वृक्षारोपण अभियान सञ्चालन गरिएको बताए। उनले सामाजिक उत्तरदायित्वअन्तर्गत आगामी दिनमा पनि यस्ता कार्यक्रमलाई निरन्तरता दिइने जानकारी दिए।
डा. पटेलले बढ्दो प्रदूषण र तापक्रम नियन्त्रणका लागि वृक्षारोपण अपरिहार्य रहेको बताउँदै वातावरण संरक्षणमा सक्रिय भूमिका निर्वाह गर्न सबैलाई आग्रह गरे।
स्थानीयवासीहरूले हस्पिटलको पहलको प्रशंसा गर्दै यस्ता अभियानले वातावरण संरक्षणसँगै समाजमा सकारात्मक सन्देश प्रवाह गर्ने विश्वास व्यक्त गरेका छन्।
