वीरगंज । नेपाल पत्रकार महासंघ मधेश प्रदेश समितिको आफ्नै प्रादेशिक भवन निर्माण कार्यको शुक्रबार शिलान्यास गरिएको छ । मधेश प्रदेश सरकारका गृह, सञ्चार तथा कानुन मन्त्री फकिरा महतो ले जनकपुरधाम उपमहानगरपालिका–४ स्थित महासंघको भवन शिलान्यास गरेका हुन् ।
गणतन्त्र दिवसको अवसर पारेर आयोजित कार्यक्रमलाई सम्बोधन गर्दै मन्त्री महतोले पत्रकार महासंघको प्रादेशिक कार्यालयलाई सुविधा सम्पन्न भवनका रूपमा निर्माण गरिने बताए । उनले महासंघका पदाधिकारी, अर्थ मन्त्रालय तथा गृह, सञ्चार तथा कानुन मन्त्रालयबीच समन्वय गरी आगामी बजेटमार्फत आवश्यक रकम व्यवस्थापन गरिने जानकारी दिए ।
नेपाल पत्रकार महासंघ मधेश प्रदेश समितिका अध्यक्ष श्याम बन्जाराले अग्रज पत्रकारहरूले देखेको सपना पूरा गर्ने अभियान सुरु भएको बताए । उनले नेपालमै पहिलोपटक मधेश प्रदेश समितिको आफ्नै भवन निर्माणको सपना साकार भएको उल्लेख गर्दै निर्वाचनका बेला गरिएको प्रतिबद्धता अनुसार भवन निर्माण कार्य अघि बढाइएको बताए ।
अध्यक्ष बन्जाराले प्रारम्भिक चरणमा दुई कोठे भवन निर्माण सुरु गरिएको जानकारी दिँदै छिट्टै आधुनिक तथा सुविधा सम्पन्न भवन निर्माण सम्पन्न हुने विश्वास व्यक्त गरे ।
शिलान्यास कार्यक्रममा नेपाल पत्रकार महासंघका केन्द्रीय लेखा समिति संयोजक केसी लामिछाने, स्वतन्त्र सेनानी राम भरत, नेपाल पत्रकार महासंघका केन्द्रीय सदस्य एवं मधेश प्रदेश इन्चार्ज राजेश कर्ण, आमसञ्चार प्राधिकरणका जितेन्द्र सिंह खड्का, मिडिया काउन्सिलका कार्यवाहक अध्यक्ष बन्दना झा लगायत महासंघका पदाधिकारी, सञ्चारकर्मी तथा विभिन्न क्षेत्रका प्रतिनिधिहरूको सहभागिता रहेको थियो । कार्यक्रमको सहजीकरण महासचिव शैलेन्द्र महतोले गरेका थिए ।
