वीरगंज । वीरगंज महानगरपालिकाका मेयर राजेशमान सिंह सहित ३ जनाविरुद्ध पर्सा जिल्ला अदालतले पक्राउ पुर्जी जारी गरेको छ ।
लियाकत अलीको जाहेरीका आधारमा दर्ता भएको लिखत सम्बन्धी कसुर मुद्दामा अदालतले मेयर सिंहसहित ३ प्रतिवादीलाई पक्राउ गर्न अनुमति दिएको हो । अदालतले लिखत किर्ते तथा नागरिकता सम्बन्धी कसुरमा पक्राउ पुर्जी जारी गरेको जनाएको छ ।
अदालतका तहसिलदार देवराज भट्टराईले मेयर सिंहलाई पक्राउ गर्न अनुमति दिइएको पुष्टि गर्दै उक्त आदेश गत जेठ ८ गते नै जारी भएको जानकारी दिए ।
जिल्ला प्रहरी कार्यालय पर्साका डीएसपी हरिबहादुर बस्नेतले पनि मेयर सिंहसहित ३ जनाविरुद्ध नागरिकता सम्बन्धी लिखत कसुरमा पक्राउ अनुमति प्राप्त भएको बताएका छन् ।
पर्सा जिल्ला अदालतले जिल्ला प्रहरी कार्यालय पर्सालाई पत्राचार गर्दै प्रतिवादीहरूको नाममा सूचना, सात दिने पक्राउ पुर्जी तथा ३५ दिने पक्राउ पुर्जी पठाएको जनाएको छ । अदालतले सात दिनभित्र खोजतलास गरी पक्राउ परे अदालतमा उपस्थित गराउन तथा पक्राउ नपरे ३५ दिने पक्राउ पुर्जी तामेल गर्न निर्देशन दिएको छ ।
अदालतले सम्बन्धित प्रतिवादी पक्राउ परे सूचना बुझाई भरपाईसहित अदालतमा पठाउन तथा आवश्यक परे मातहतका इलाका प्रहरी कार्यालयमार्फत पनि म्याद तामेल गराउन आग्रह गरेको छ ।
