सेढवा । पर्साको जिराभवानी गाउँपालिका–४ सुपौली निवासी अत्यन्तै विपन्न जोगिन्दर महराको छोरीको निधनपछि शोकमा रहेको परिवारलाई खाद्यान्न तथा लत्ता कपडा सहयोग गरिएको छ ।
जगरनाथपुर गाउँपालिका–४ निवासी समाजसेवी तथा गाउँपालिका अध्यक्ष प्रत्याशी बिरजेश्वर चौधरी र उनकी पत्नी सोभावती देवीको उपस्थितिमा महरा परिवारलाई आवश्यक खाद्यान्न सामग्री तथा कपडा हस्तान्तरण गरिएको हो ।
चौधरी दम्पतीले परिवारलाई चामल, चिउरा, आलु, प्याज, आटा लगायतका दैनिक उपभोग्य खाद्यान्न सामग्री सहयोग गरेका थिए । छोरीको काजक्रिया गर्न कठिनाइ भइरहेको अवस्थामा उक्त सहयोग उपलब्ध गराइएको जनाइएको छ ।
सहयोग कार्यक्रममा स्थानीय बासिन्दाको समेत सहभागिता रहेको थियो । कठिन परिस्थितिमा पीडित परिवारलाई राहतस्वरूप सहयोग गरिएको भन्दै स्थानीयले चौधरी दम्पतीप्रति धन्यवाद व्यक्त गरेका छन् ।
मानवीय सेवाभावका साथ गरिएको यस सहयोगले शोकमा रहेको महरा परिवारलाई केही राहत पुग्ने विश्वास गरिएको स्थानीयले बताएका छन् ।
