वीरगंज । मेडिकल व्यवसायी तथा राष्ट्र, राष्ट्रियता तथा नागरिक बचाउ महाअभियानका संयाेजक दुर्गा प्रसाईं विरुद्ध सोमबार पर्सा जिल्ला अदालतमा अभियोगपत्र दर्ता गरिएको छ ।
जिल्ला सरकारी वकील कार्यालय पर्साले प्रसाईंविरुद्ध विद्युतिय कारोबार ऐन तथा राज्यविरुद्धको कसुर सम्बन्धी मुद्दामा अभियोगपत्र दायर गरेको अदालत स्रोतले जनाएको छ ।
अदालत स्रोतका अनुसार सोमबारको पेशीको गोलाप्रथा प्रक्रिया सम्पन्न भइसकेपछि अभियोगपत्र दर्ता भएकाले सोही दिन थुनछेक बहस हुन सकेन । अब मंगलबार प्रसाईंको मुद्दामा थुनछेक बहस तथा सुनुवाइ हुने सम्भावना रहेको बताइएको छ ।
दुर्गा प्रसाईंलाई यही जेठ ४ गते राति सिद्धार्थ दियालो होटलबाट नेपाल प्रहरीले नियन्त्रणमा लिएको थियो । वीरगंज आएका बेला पक्राउ परेका प्रसाईंले आफूलाई गैरकानुनी रूपमा हिरासतमा राखिएको दाबी गर्दै सर्वोच्च अदालतमा बन्दी प्रत्यक्षीकरणको निवेदन दर्ता गरेका थिए ।
उक्त निवेदनमाथि सुनुवाइ गर्दै सर्वोच्च अदालतका न्यायाधीश विनोद शर्मा र नित्यानन्द पाण्डेयको इजलासले रिट खारेज गर्दै सरकारका नाममा आवश्यक आदेश जारी गरेको थियो ।
यसअघि सर्वोच्च अदालतले प्रसाईंलाई धरौटी वा हाजिरी जमानीमा रिहा गर्न आदेश दिएको भन्दै त्यसको कार्यान्वयन नभएको आरोपमा उनका समर्थकहरूले सोमबार पर्सा जिल्ला अदालत अगाडिको सडकमा प्रदर्शनसमेत गरेका थिए ।
