कलैया । राष्ट्रिय स्वतन्त्र पार्टी (रास्वपा) बाराको विस्तारित बैठक शनिबार तनावग्रस्त बनेको छ । कलैयास्थित करणराज पार्टी प्यालेसमा आयोजित बैठकमा संस्थापन पक्ष र संस्थापक कार्यकर्ताबीच विवाद चर्किँदा कुटाकुटको अवस्था सिर्जना भएको हो ।
झडपमा रास्वपाका महागढीमाई नगर सभापति बिक्रम यादव, सिम्रौनगढ नगर सभापति साहेब अन्सारीसहित तीन जना घाइते भएका छन् । घाइतेहरूको कलैया प्रादेशिक अस्पतालमा उपचार भइरहेको जनाइएको छ ।
रास्वपा बाराका संस्थापक जिल्ला अध्यक्ष चन्दन स्वर्णकार पक्षका कार्यकर्ताले बैठकमा पुराना तथा संस्थापक कार्यकर्तामाथि हातपात भएपछि स्थिति तनावपूर्ण बनेको आरोप लगाएका छन् । उपचाररत महागढीमाई नगर सभापति बिक्रम यादवले प्रतिनिधिसभा सदस्य अरविन्द साहले आफ्नो हात समातेर बाहिरबाट ल्याइएका व्यक्तिमार्फत कुटपिट गराएको आरोप लगाए ।
असन्तुष्ट पक्षका अनुसार स्थानीय तह निर्वाचनका लागि उम्मेदवारको टिकट पहिले नै बिक्री गरिएको सूचना बाहिरिएपछि सो विषयमा स्पष्टीकरण माग्दा विवाद सुरु भएको थियो । बैठकमा नयाँ प्रवेश गरेका व्यक्तिहरूले कार्यसमितिमा कब्जा गर्न खोजेको तथा लामो समयदेखि संगठन निर्माणमा लागेका कार्यकर्तालाई पाखा लगाइएको भन्दै संस्थापक पक्ष रुष्ट बनेको बताइएको छ ।
केन्द्रबाट प्रतिनिधि कामनी चौधरीलाई पठाएर विवाद समाधानका लागि विस्तारित बैठक राखिए पनि स्थिति नियन्त्रण बाहिर गएको सहभागीहरूले बताएका छन् । विवाद बढेपछि आक्रोशित कार्यकर्ताहरूले बैठकस्थलमा उपस्थित बाराका चारै जना सांसदहरूमाथि समेत हातपातको प्रयास गरेका थिए ।
स्थिति तनावपूर्ण बनेपछि सुरक्षाकर्मीले क्षेत्र नं. १ का सांसद गणेश धिमाल, क्षेत्र नं. २ का सांसद चन्दन सिंह, क्षेत्र नं. ३ का सांसद अरविन्द साह, क्षेत्र नं. ४ का सांसद रहबर अन्सारी तथा केन्द्रीय प्रतिनिधि कामनी चौधरीलाई सुरक्षा घेराभित्र राखेर बैठकस्थलबाट बाहिर निकालेका थिए ।
यता, बैठकस्थलबाट बाहिरिएका सांसदहरूले कलैयास्थित बरेवा दरबार होटलमा पत्रकार सम्मेलन गर्दै सञ्चारमाध्यममा आएका सांसदहरु लेखेटिए समाचारको खण्डन गरेका छन् । सांसद गणेश धिमाल, चन्दन सिंह र अरविन्द साहले बैठकमा कुनै अप्रिय घटना नभएको दाबी गर्दै आफूहरूमाथि कुटपिट नभएको बताएका छन् ।
प्रतिनिधिसभा सदस्य रहबर अन्सारीले जिल्ला अधिवेशनको सन्दर्भमा बैठक आयोजना गरिएको र निष्काशित पक्षले कार्यक्रम बिथोल्न खोजेको आरोप लगाए । उनले विवादका बाबजुद कार्यक्रम सफलतापूर्वक सम्पन्न भएको दाबी गरे ।
गत वैशाख २७ गते रास्वपाको केन्द्रीय समितिले बारा जिल्ला कार्यसमिति विघटन गरेको थियो । त्यस लगतै फैरी जेठ ६ गते संस्थापक जिल्ला सभापति चन्दन स्वर्णिकारकाे रास्वपाले सदस्यता खारेज गरेपछि जिल्ला संगठनभित्रको विवाद झन् गहिरिँदै गएको देखिएको छ ।
