कलैया । राष्ट्रिय स्वतन्त्र पार्टी (रास्वपा) बारा जिल्लाको विस्तारित बैठकका क्रममा तनाव उत्पन्न हुँदा प्रतिनिधिसभा सदस्य (सांसद)हरू बैठक स्थलबाटै लखेटिएका छन् ।
शनिबार कलैयामा आयोजित बैठकमा बारा जिल्लाका प्रतिनिधिसभा सदस्यहरू रहबर अन्सारी, अरबिन्द साह, गणेश धिमाल र चन्दन सिंह सहित पार्टीका नेताहरू सहभागी भएका थिए ।
बैठकमा सहभागी कार्यकर्ताहरूका अनुसार सांसद पक्षले संस्थापक समूहलाई दबाबमा पार्न खोजेपछि विवाद चर्किएको थियो । विवाद बढ्दै जाँदा आक्रोशित कार्यकर्ताले सांसदहरूलाई धक्का दिँदै बैठक स्थलबाट बाहिर निकालेका थिए ।
स्थिति तनावपूर्ण बनेपछि प्रहरीले हस्तक्षेप गर्दै सांसदहरूलाई सुरक्षित रूपमा बाहिर निकालेको बताइएको छ । घटनापछि बैठकस्थल केहीबेर तनावग्रस्त बनेको थियो ।
यही जेठ ६ गते मात्रै बाराका संस्थापक जिल्ला सभापति चन्दन स्वर्णकारको पार्टी सदस्यता खारेज गरिएपछि रास्वपा बारा जिल्लाभित्रको आन्तरिक विवाद थप गहिरिएको बताइएको छ ।
