वीरगंज । हिन्दु पत्रकार संघले क्रियाशील युवा पत्रकार मञ्च नेपालका नवनिर्वाचित अध्यक्ष आनन्द पटेललाई सम्मान गरेको छ । संघका कोषाध्यक्ष समेत रहेका पटेललाई मञ्चको अध्यक्ष जस्तो गरिमामय पदमा निर्विरोध निर्वाचित भएको अवसरमा सम्मान गरिएको हो ।
वीरगंजमा आयोजित एक कार्यक्रमबीच हिन्दु पत्रकार संघले टीका, माला तथा गम्छा लगाई पटेललाई सम्मान गरेको जनाएको छ । कार्यक्रममा वक्ताहरूले पत्रकारिता क्षेत्रको विकास, युवा पत्रकारहरूको क्षमता अभिवृद्धि तथा संगठनात्मक नेतृत्वमा आनन्द पटेलले महत्वपूर्ण भूमिका निर्वाह गर्ने विश्वास व्यक्त गरेका थिए ।
हिन्दु पत्रकार संघका केन्द्रीय अध्यक्ष राजन रौनियारको अध्यक्षतामा सम्पन्न कार्यक्रममा सहभागीहरूले नव निर्वाचित अध्यक्ष पटेललाई सफल कार्यकालको शुभकामना दिएका थिए ।
कार्यक्रममा संघका उपाध्यक्ष बिनोद पटेल, राकेश साह, कन्हैया पटेल, सन्तोष कुश्वाहा, सन्जय कुश्वाहा, अनिल ओझा, अर्जुन चौधरी लगायत पदाधिकारी तथा पत्रकारहरूको विशेष उपस्थिति रहेको थियो ।
सम्मान कार्यक्रममा बोल्दै अध्यक्ष पटेलले आफूलाई प्रदान गरिएको सम्मानले थप जिम्मेवार र उत्साहित बनाएको उल्लेख गर्दै पत्रकारहरूको हकहित, पेशागत सुरक्षा तथा निष्पक्ष पत्रकारिताको प्रवर्द्धनका लागि निरन्तर सक्रिय रहने प्रतिबद्धता व्यक्त गरे ।
