वीरगंज । पोखराको लिचीबारी भ्रष्टाचार प्रकरणमा थुनामा रहेका पूर्व सङ्घीय मामिला तथा सामान्य प्रशासन मन्त्री राजकुमार गुप्ता आज धरौटी बुझाएर रिहा हुने भएका छन् ।
काठमाडौंस्थित डिल्लीबजार कारागारमा रहेका पूर्वमन्त्री गुप्तालाई सर्वोच्च अदालतको आदेशपछि धरौटीमा रिहा गर्न लागिएको हो । मंगलबार सर्वोच्च अदालतको इजलास नं. ७ को संयुक्त इजलासले ५० लाख रुपैयाँ धरौटी माग गर्ने आदेश दिएको इजलास अधिकृत उदय प्रकाश लिम्बुले जानकारी दिए । उनका अनुसार मंगलबार आदेश भए पनि बुधबार मात्र मिसिल विशेष अदालत पुगेपछि धरौटी प्रक्रिया अघि बढाइएको हो ।
सर्वोच्च अदालतका न्यायाधीश शारङ्गा सुवेदी र सुनिल कुमार पोखरेलको संयुक्त इजलासले विशेष अदालतको पूर्व आदेश बदर गर्दै धरौटीमा माग गर्न आदेश दिएको हो । सोही आदेशअनुसार बुधबार गुप्ताका परिवारले ५० लाख रुपैयाँ बराबरको बैंक ग्यारेन्टी बुझाएका छन् । धरौटी रकम बुझाइएपछि आजै रातिसम्म गुप्ता रिहा हुने सम्भावना रहेको छ ।
पूर्वमन्त्री गुप्ताको तर्फबाट अधिवक्ता कृष्ण प्रसाद पोखरेल, अजयजंशकर झा, दिपेन्द्र झा र कुमार शिलवालसहित आधा दर्जनभन्दा बढी कानुन व्यवसायीले बहस गरेका थिए । नेपाल सरकारको तर्फबाट सरकारी वकिल रामहरि शर्मा काफ्लेले बहस गरेका थिए ।
यसअघि २०८२ पुस १६ गते विशेष अदालतका न्यायाधीश सुदर्शनदेव भट्ट, डिल्लीरत्न श्रेष्ठ र विदुर कोइराला सम्मिलित इजलासले गुप्तालाई थुनामा राखेर अनुसन्धान अघि बढाउन आदेश दिएको थियो । साे आदेशकाे साढे ५ महिना पछि पूर्व मन्त्री गुप्ता रिह हुन लागेका हुन् ।
