वीरगंज । पर्सा क्षेत्र नं. १ बाट निर्वाचित प्रतिनिधि सभा सदस्य हरि पन्तले वीरगंजस्थित हरिखेतान बहुमुखी क्याम्पसमा देखिएको विवाद समाधान गर्न सरकारसँग छानबिन समिति गठनको माग गरेका छन् ।
आज प्रतिनिधि सभा बैठकमा शून्य समयमा बोल्दै सांसद पन्तले २०३८ सालमा स्थापना भएको हरिखेतान सामुदायिक क्याम्पस अहिले झडपस्थलमा परिणत भएको भन्दै चिन्ता व्यक्त गरे । उनले क्याम्पसमा करिब चार हजार विद्यार्थी तथा १५० प्राध्यापक र कर्मचारी कार्यरत रहेको उल्लेख गर्दै दैनिकजसो हुने नाराजुलुस र झडपका कारण विद्यार्थीहरूको भविष्य अन्योलमा परेको बताए ।
उनका अनुसार गुठी संस्थानको जग्गामा निर्माण गरिएको क्याम्पसमा निर्माण सामग्री उपलब्ध गराउन आर्थिक सहयोग गरेका केही दाता परिवारसँग सम्बन्धित व्यक्तिहरूले पटक–पटक क्याम्पसको मूल विधान संशोधन गर्दै आएको आरोप लगाए । यसले सामुदायिक क्याम्पस निजीकरणतर्फ उन्मुख भएको आभास पैदा गरेको उनको भनाइ थियो ।
सांसद पन्तले हालै भएको एक झडपमा क्याम्पस प्रमुख नै दुर्व्यवहारमा परेको तथा केही कर्मचारी अझै प्रहरी हिरासतमा रहेको जानकारी दिए । साथै केही कर्मचारीलाई सेवाबाट हटाइएको अवस्थासमेत रहेको उनले बताए ।
उनले सम्माननीय सभामुखमार्फत नेपाल सरकार तथा सम्बन्धित नियामक निकायलाई यथाशीघ्र छानबिन समिति गठन गरी सामुदायिक क्याम्पसको मर्मअनुसारको विधान लागू गर्दै पठनपाठन पूर्ण रूपमा सञ्चालन गराउन माग गरेका छन् ।
