वीरगंज । मेडिकल व्यवसायी तथा ‘राष्ट्र, राष्ट्रियता, धर्म, संस्कृति र नागरिक बचाउन महाअभियान नेपाल’ का संयोजक दुर्गा प्रसाईँमाथि दुई वटा मुद्दामा प्रहरीले म्याद थप गरेकाे छ । झापाको विर्तामोड नगरपालिका–५ स्थायी घर भई हाल भक्तपुरको मध्यपुर ठिमी नगरपालिका–६ मा बसोबास गर्दै प्रसाईँलाई पर्सा प्रहरीले साेमबार राति नियन्त्रणमा लिएकाे थियाे ।
वीरगंजस्थित सिद्धार्थ दियालो होटलबाट पक्राउ परेका प्रसाईँविरुद्ध विधुतीय कराेबार ऐन र राज्य विरुद्धकाे कसुरमा पर्सा जिल्ला अदालतबाट ३ दिन म्याद अनुमति लिई अनुसन्धान भइरहेकाे जिल्ला प्रहरी कार्यालय पर्साका प्रवक्ता डीएसपी हरिबहादुर बस्नेतले जानकारी दिए ।
वीरगंजको मुख्य सडक विस्तार अभियान अन्तर्गत सडक क्षेत्रमा बनेका संरचना हटाउने सरकारी कार्यको विरोध गर्दै प्रसाईँले सरकारविरुद्ध जनतालाई उक्साउने गतिविधि गरेको आरोप प्रहरीले लगाएको छ । सोमबार वीरगंज आएका प्रसाईँले भत्काइएका घरधनीहरुलाई बैंकको ऋण नतिर्न आग्रह गरेको विषयलाई पनि प्रहरीले अनुसन्धानको आधार बनाएको जनाएको छ ।
विभिन्न सञ्चार माध्यम तथा सामाजिक सञ्जालमार्फत सार्वजनिक नैतिकता, शिष्टाचारविरुद्ध अभिव्यक्ति दिएको आरोपमा पनि प्रहरीले अनुसन्धान गरिरहेकाे जनाएकाे छ । प्रहरीका अनुसार प्रसाईँले सामाजिक सञ्जालमार्फत विभिन्न जातजाति तथा सम्प्रदायबीचको सुमधुर सम्बन्धमा खलल पुग्ने, कसैप्रति घृणा वा द्वेष फैलाउने तथा नेपाल सरकारप्रति अवहेलना हुने किसिमका अमर्यादित र अस्वस्थ आलोचनात्मक अभिव्यक्ति दिएको आरोप छ।
सोमबार वीरगंज पुगेका प्रसाईँको मंगलबार बिहान वीरगंजस्थित प्रसिद्ध गहवामाई मन्दिरमा दर्शन गर्ने कार्यक्रम तय गरिएको थियो । तर त्यसअघि नै उनलाई होटलबाट प्रहरीले नियन्त्रणमा लिएको थियो ।
प्रसाईँ पक्राउ परेपछि उनका समर्थकहरुले सोमबार राति र मंगलबार विहान पनि जिल्ला प्रहरी कार्यालय पर्सा अगाडि उनका समर्थकहरुले विरोध प्रदर्शन गरेका थिए । उनकाे रिहाईकाे माग गर्दै उनका समर्थकहरुले सामबार रातिदेखि नै प्रदर्शन गरिरहेका छन् ।
