वीरगंज । नेपाल नेत्रज्योति संघ पर्साको आयोजनामा बुधबार श्री नेपाल राष्ट्रिय माध्यमिक विद्यालय पटेर्वासुगैलीमा निःशुल्क आँखा परीक्षण, चश्मा तथा औषधि वितरण कार्यक्रम सम्पन्न भएको छ।
विद्यालय व्यवस्थापन समितिका अध्यक्ष धनराज पन्जियारको अध्यक्षतामा सम्पन्न कार्यक्रमको उद्घाटन नेपाल नेत्रज्योति संघ पर्साका सभापति भगवती चौधरीले गरेका थिए ।
पटेर्वासुगौली गाउँपालिका वडा नं. ४ स्थित विद्यालयमा भएको शिविरबाट विद्यार्थी तथा शिक्षक गरी करिब २८० जना लाभान्वित भएका आयोजकले जनाएको छ । आवश्यकता अनुसार निःशुल्क औषधि तथा चश्मा समेत वितरण गरिएको थियो ।
कार्यक्रममा वडा नं. ४ का वडाध्यक्ष वासु पन्जियार, विद्यालयका प्रधानाध्यापक रामाशंकर चौधरी तथा जिल्ला कार्यसमिति सदस्य मधुसूदन उपाध्याय लगायत सहभागी भएका थिए ।
कार्यक्रमपछि विद्यालय व्यवस्थापन समिति तथा शिक्षकहरूले नेपाल नेत्रज्योति परिवारप्रति धन्यवाद ज्ञापन गर्दै सम्मानपत्र प्रदान गरेका थिए ।
शिविरमा वरिष्ठ नेत्र सहायक शिवशंकर प्रसाद, कौशल कुमार कर्ण तथा नेत्र सहायक अञ्जली चौधरीले प्राविधिक सहयोग गरेको नेपाल नेत्रज्योति संघ पर्सा जिल्ला कार्यसमिति सदस्य राजन श्रीवास्तवले जानकारी दिए ।
