वीरगंज । पर्सा प्रशासनद्वारा वीरगंजका विभिन्न मासु पसलमा गरिएको अनुगमनका क्रममा अखाद्य मासु बिक्री तथा व्यवसाय दर्ता नगरी सञ्चालन गरिएको भेटिएपछि दुई व्यवसायीलाई जरिवाना गरेको छ।
जिल्ला प्रशासन कार्यालय पर्साका अनुसार मंगलबार संयुक्त अनुगमन टोलीले वीरगंजका विभिन्न स्थानमा रहेका मासु पसलहरूको अनुगमन गरेको थियो । अनुगमनका क्रममा वीरगंज महानगरपालिका–१२ स्थित “दिलसाद फ्रेस मिट हाउस” ले मासुमा अखाद्य रंग मिसाएको तथा मूल्य सूची नराखेको पाइएपछि उक्त पसललाई २० हजार रुपैयाँ जरिवाना गरिएको हो ।
त्यसैगरी, वीरगंज महानगरपालिका–१३ निवासी अफरोज अंसारीले व्यवसाय दर्ता नगरी मासु बिक्री वितरण गर्दै आएको भेटिएपछि उनलाई पनि २० हजार रुपैयाँ जरिवाना गरिएको जिल्ला प्रशासन कार्यालय पर्साले जनाएको छ ।
अनुगमनका क्रममा बरामद गरिएको अखाद्य मासु जफत गरी नष्ट गरिएको प्रशासनले जनाएको छ । साथै उपभोक्ताको स्वास्थ्यमा प्रत्यक्ष असर पर्ने खालका गतिविधि नगर्न व्यवसायीहरूलाई प्रशासनले चेतावनी समेत दिएको छ ।
