वीरगन्ज । भारतको आदापुरस्थित श्यामपुर चोकबाट ७६.६६ ग्राम स्म्याकजस्तो देखिने लागुऔषधसहित एक नेपाली नागरिक पक्राउ परेका छन् ।
भारत–नेपाल सीमा क्षेत्रमा लागुऔषध तस्करी नियन्त्रणका लागि सञ्चालन गरिएको संयुक्त अभियानअन्तर्गत सशस्त्र सीमा बल (एसएसबी) र आदापुर प्रहरीले उनलाई पक्राउ गरेको हो ।
पक्राउ पर्नेमा नेपालका फुलवरिया निवासी मनोहर सिंह रहेका छन् । उनी जयराम सिंहका छोरा हुन् ।
प्रहरीका अनुसार सिंहको साथबाट ७६.६६ ग्राम स्म्याकजस्तो देखिने लागुऔषध बरामद भएको छ । पक्राउपछि उनलाई आवश्यक कानुनी प्रक्रिया पूरा गरी थप अनुसन्धान अघि बढाइएको प्रहरीले जनाएको छ ।
सीमा क्षेत्रमा लागुऔषधको अवैध कारोबार नियन्त्रण गर्न भारतीय तथा नेपाली सुरक्षा निकायले निगरानी र अभियानलाई निरन्तरता दिँदै आएका छन् ।








