वीरगंज । नेपाल नेत्रज्योति संघ को आयोजनामा श्री दीपनारायण आदर्श नमूना माध्यमिक विद्यालय मा निःशुल्क आँखा परीक्षण, चश्मा तथा औषधि वितरण कार्यक्रम सम्पन्न भएको छ। विद्यार्थी तथा शिक्षकहरूको आँखासम्बन्धी स्वास्थ्य परीक्षण गर्ने उद्देश्यले आयोजित उक्त शिविरबाट सयौं व्यक्ति लाभान्वित भएका छन्।
कार्यक्रमको सभापतित्व नेपाल नेत्रज्योति संघ पर्साका सभापति भगवती चौधरीले गरेका थिए भने प्रमुख अतिथिका रूपमा संघका केन्द्रीय वरिष्ठ उपाध्यक्ष श्यामकुमार पोखरेल को उपस्थिति रहेको थियो । पोखरेलले विद्यार्थीहरूलाई चश्मा तथा उपचारसम्बन्धी पर्चा हस्तान्तरण गर्दै कार्यक्रमको उद्घाटन गरेका थिए ।
शिविरमा विद्यालयका विद्यार्थी तथा शिक्षक गरी करिब ५१५ जनाको आँखा परीक्षण गरिएको आयोजकले जनाएको छ । परीक्षणका क्रममा आवश्यकताअनुसार निःशुल्क औषधि तथा चश्मासमेत वितरण गरिएको थियो ।
कार्यक्रमपछि विद्यालय व्यवस्थापन समिति तथा शिक्षकहरूले नेपाल नेत्रज्योति संघ परिवारप्रति आभार व्यक्त गरेका थिए। विद्यालय व्यवस्थापन समितिका सदस्य राजन श्रीवास्तव ले यस्ता स्वास्थ्यसम्बन्धी शिविरहरूले विद्यार्थीहरूमा स्वास्थ्य सचेतना अभिवृद्धि गर्नुका साथै आवश्यक उपचारमा सहज पहुँच पुर्याउन महत्वपूर्ण भूमिका खेल्ने बताए ।
आयोजकका अनुसार आगामी दिनमा पनि समुदायस्तरमा यस्ता निःशुल्क स्वास्थ्य शिविरलाई निरन्तरता दिइनेछ ।
