वीरगंज । मधेशवादी आन्दोलनका अग्रणी व्यक्तित्व स्वर्गीय रामजन्म तिवारीको २७औँ स्मृति दिवस वीरगंजमा मनाइएको छ। वीरगंजको घण्टाघरस्थित स्व. तिवारीकाे सालिक परिसरमा आयोजित कार्यक्रममा विभिन्न राजनीतिक, सामाजिक तथा बौद्धिक व्यक्तित्वहरूको सहभागिता रहेको थियो ।
प्रोफेसर भाग्यनाथ गुप्ताको अध्यक्षतामा सम्पन्न कार्यक्रममा मधेशवादी आन्दोलनका योद्धा अधिवक्ता सुरेन्द्र कुर्मी, अधिवक्ता पन्नालाल गुप्ता, शशी कपूर मियाँ, नेजामुदिन समानी, शिव पटेल, शम्भु गुप्ता, श्याम गुप्ता, अखिलेश प्रसाद लगायत स्व. तिवारीका पुत्र अधिवक्ता आशुतोष तिवारी, परिवारजन, अनुयायी तथा सञ्चारकर्मीहरूको उपस्थिति रहेको थियो।
कार्यक्रममा सहभागीहरूले स्व. तिवारीको सालिकमा माल्यार्पण तथा पुष्प अर्पण गर्दै उहाँले देखाएको मार्गमा अघि बढ्दै अधिकार सम्पन्न, समुन्नत मधेश र समृद्ध नेपाल निर्माण गर्ने संकल्प व्यक्त गरेका थिए ।
कार्यक्रमलाई सम्बोधन गर्दै अधिवक्ता सुरेन्द्र कुर्मीले स्व. रामजन्म तिवारीलाई मधेशी जनताको हक–अधिकारका लागि पहिलो पटक सशक्त आवाज उठाउने योद्धाका रूपमा स्मरण गरे । उनले स्व. तिवारीले २००७ सालको क्रान्तिदेखि पञ्चायती व्यवस्थाविरुद्धको आन्दोलनसम्म निरन्तर संघर्ष गरेको उल्लेख गर्दै विभिन्न समयमा जेल जीवन बिताउनुपरे पनि कहिल्यै विचलित नभएको बताए ।
कुर्मीले २०४६ सालको जनआन्दोलनमा पनि स्व. तिवारी अग्रपंक्तिमा रहेर नेतृत्वदायी भूमिका निर्वाह गरेको स्मरण गरे । उनले नेपाल सद्भावना परिषद्लाई नेपाल सद्भावना पार्टीको रूपमा विस्तार गरी मधेशी मुद्दालाई राष्ट्रिय राजनीतिमा स्थापित गराउन महत्वपूर्ण योगदान दिएको बताए । चुनावपछि स्वयं मन्त्री नबनी गजेन्द्र नारायण सिंहलाई मन्त्री बनाएर मधेशी मुद्दालाई संसदसम्म पुर्याउन त्यागपूर्ण भूमिका खेलेको उनले बताए।
कार्यक्रमका अध्यक्ष प्रो. भाग्यनाथ गुप्ताले २००७ सालदेखि नै मधेश र मधेशी समुदायको आवाज बुलन्द गर्ने पहिलो योद्धा स्व. रामजन्म तिवारी नै रहेको बताए । उनले मधेशी समुदायमाथि भएको विभेदविरुद्ध तराई कांग्रेसमार्फत नेपाली कांग्रेस सरकार र तत्कालीन राजा त्रिभुवनसमक्ष समेत आवाज उठाएको स्मरण गरे ।
प्रो. गुप्ताले राजा महेन्द्रद्वारा २०१६ सालमा जननिर्वाचित सरकार हटाएर सत्ता आफ्नो हातमा लिएपछि स्व. तिवारीले त्यसको कडा विरोध गरेको बताए । साथै पञ्चायती व्यवस्थाका क्रममा हर्क गुरुङको बसाइँसराइ सम्बन्धी प्रतिवेदन तथा मधेशविरोधी नीतिको समेत सशक्त विरोध गर्दा पटक–पटक जेल जानुपरेको स्मरण गरे ।
कार्यक्रममा स्वागत मन्तव्य स्व. तिवारीका पुत्र अधिवक्ता आशुतोष तिवारीले राखेका थिए भने कार्यक्रम सञ्चालन वीरगंज कपडा बैंकका अध्यक्ष तथा सञ्चारकर्मी लालबाबु सिंहले गरेका थिए ।
