वीरगंज । अख्तियार दुरुपयोग अनुसन्धान आयोगले नेपाल विद्युत प्राधिकरण अन्तर्गत वितरण केन्द्र कञ्चनपुर, सप्तरीका प्रमुख महेन्द्र कुमार दास विरुद्ध घुस/रिसवत लिएको आरोपमा विशेष अदालतमा भ्रष्टाचार मुद्दा दायर गरेको छ ।
आयोगद्वारा जारी प्रेस विज्ञप्तिअनुसार चार्जिङ स्टेशनका लागि ट्रान्सफर्मर राखी विद्युत लाइन छाडिदिने प्रयोजनार्थ सेवाग्राहीसँग घुस मागिरहेको भन्ने सूचना तथा उजुरीका आधारमा अख्तियारको इटहरी कार्यालयबाट खटिएको टोलीले दासलाई सेवाग्राहीबाट १ लाख ४० हजार रुपैयाँ घुस लिइसकेको अवस्थामा रकमसहित नियन्त्रणमा लिएको थियो ।
अनुसन्धानका क्रममा दासले चार्जिङ स्टेशन सञ्चालनका लागि आवश्यक प्रक्रिया पूरा भइसकेपछि लाइन छाडिदिएवापत सेवाग्राहीसँग घुस रकमका लागि बार्गेनिङ गरेको तथा रकम नदिए लाइन काटिदिने धम्कीसमेत दिएको खुलेको अख्तियारले जनाएको छ ।
आयोगले दासविरुद्ध विशेष अदालत मा भ्रष्टाचार निवारण ऐन, २०५९ अन्तर्गत मुद्दा दायर गर्दै बिगो १ लाख ४० हजार रुपैयाँ कायम गरी सोही बराबर जरिवाना तथा कैद सजायको मागदाबी गरेको आयोगका प्रवक्ता सुरेश न्यौपानेले जानकारी दिए ।
