वीरगंज । गौतम माध्यमिक विद्यालय मा अध्ययनरत दुई छात्रामाथि भएको व्यवहार सम्बन्धी विवाद अन्ततः आपसी सहमति र मेलमिलापमार्फत समाधान गरिएको छ ।
विद्यालय र अभिभावक पक्षबीच भएको सहमति–पत्र अनुसार नयाँ शैक्षिक सत्र सुरु भइसकेको अवस्थामा गत वैशाख २१ गते विद्यालय परिसरमा विद्यार्थी भर्ना प्रवेश परीक्षा सञ्चालन भइरहेको तथा बाहिर ग्रीनसिटी अभियान र वीरगंज महानगरपालिका को सहकार्यमा नाला सफाइ कार्यक्रम चलिरहेका कारण अत्यधिक भीडभाड भएको उल्लेख गरिएको छ ।
सोही क्रममा कक्षा–१० मा अध्ययनरत छात्रा अंकिता गुप्ता र कक्षा–८ की छात्रा आराध्या गुप्ता कक्षा प्रवेश कार्ड साथमा नल्याई आएको कारण केही समय कक्षाबाहिर बस्नुपरेको जनाइएको छ । उक्त विषयमा छात्राहरूसँग सहज संवाद गरी कक्षामा प्रवेश गराउनुपर्नेमा परिस्थितिवश त्यसो हुन नसकेको र त्यसबाट छात्रा तथा अभिभावकलाई मानसिक पीडा पुगेकोप्रति विद्यालय प्रशासनले हार्दिक खेद प्रकट गरेको छ ।
विद्यालयले उक्त घटना नियतवश नभई परिस्थितिजन्य भएको स्पष्ट पार्दै भविष्यमा यस्ता त्रुटि पुनः नदोहोरिने प्रतिबद्धता जनाएको छ । दुवै पक्षबीच आपसी समझदारी, सहमति तथा मेलमिलापमार्फत विवाद समाधान गरी सुमधुर सम्बन्ध कायम राख्न सहमति भएको जनाइएको छ ।
सहमति–पत्रमा अभिभावक पक्ष प्रथम पक्ष तथा विद्यालय दोस्रो पक्षका रूपमा रहेका छन् । सहमतिमा पिन्टु रानिमार, सन्तोष पटेल, ललित कर्ण र रमेश कुमार शर्मा साक्षी बसेका छन् भने सुरेश प्रसाद गुप्ता रहोबर रहेका छन् ।
