वीरगंज । जिल्ला प्रशासन कार्यालय पर्साले निजी विद्यालय र पुस्तक तथा पोशाक पसलहरूको मिलेमतोमा भइरहेको आर्थिक शोषणप्रति गम्भीर ध्यानाकर्षण भएको जनाएको छ ।
कार्यालयले सार्वजनिक सूचना जारी गर्दै प्रचलित कानून विपरीत विद्यार्थी तथा अभिभावकलाई तोकिएकै निश्चित पसलबाट मात्र पाठ्यपुस्तक र विद्यालय पोशाक खरिद गर्न बाध्य पार्ने कार्य तत्काल बन्द गर्न चेतावनी दिएको हो ।
सूचनामा कतिपय निजी विद्यालयहरूले अभिभावकलाई अन्य पसलबाट सामान खरिद गर्न नदिई निश्चित पसलबाट मात्र किन्न बाध्य बनाएको, साथै उपभोक्ताले पाउनुपर्ने छुटसमेत नदिई विद्यालय प्रशासन र व्यवसायीबीच मिलेमतोमा गैरकानूनी आर्थिक लाभ लिइरहेको भन्ने जनगुनासो प्राप्त भएको उल्लेख गरिएको छ ।
सहायक प्रमुख जिल्ला अधिकारी कृष्ण थापाद्वारा जारी सूचनामा यस्तो सिन्डिकेट, एकाधिकार र आर्थिक शोषणजन्य गतिविधि तत्काल बन्द नगरे विद्यालय र सम्बन्धित पसल दुवैलाई प्रचलित ऐन तथा कानून बमोजिम हदैसम्मको कडा कानुनी कारवाही गरिने चेतावनी दिइएको छ ।
कार्यालयले अभिभावक तथा सरोकारवालालाई यदि कसैले निश्चित पसलबाट मात्रै किताब वा पोशाक खरिद गर्न बाध्य पारेको प्रमाण, बिल वा अन्य ठोस आधार भए कार्यालयमा उजुरी दर्ता गराई कानुनी कारवाहीमा सहयोग गर्न आग्रह गरेको छ ।
वीरगंजका अधिकांश निजी विद्यालयहरूले केही सीमित पुस्तक तथा कपडा पसलसँग मात्रै कारोबार गर्दै आएका छन् । ती पसलहरूले विद्यालयलाई मोटाे रकम कमिशनका रूपमा उपलब्ध गराउने गरेको आरोपसमेत लाग्दै आएको छ ।
वीरगंजका चर्चित तथा नाम चलेका विद्यालयहरू पनि कमिशनको लोभमा निश्चित पसलसँग मात्र कारोबार गर्दै आएको अभिभावकहरूको गुनासो छ ।
यस विषयमा कालिका टाइम्स लगायतका केही सञ्चारमाध्यमहरूले समाचार प्रकाशन गरेपछि जिल्ला प्रशासनकाे ध्यानाकर्षण भएको हाे । प्रशासनको पछिल्लो चेतावनीपछि यस्ता गतिविधिमा कमी आउने अपेक्षा अभिभावकहरूले गरेका छन् ।
यसअघि वीरगंज महानगरपालिका शिक्षा महाशाखाले पनि निजी विद्यालयहरूलाई यस्ता गतिविधि नगर्न चेतावनी दिइसकेको छ ।
