वीरगंज । वीरगंज महानगरपालिकाले आइतबारका दिन पठनपाठन पूर्ण रूपमा बन्द गर्न संस्थागत विद्यालयहरूलाई निर्देशन दिएको छ ।
संघीय सरकारले सरकारी कार्यालयसहित शिक्षण संस्थाहरू हप्तामा दुई दिन (शनिबार र आइतबार) बिदा दिने व्यवस्था गरे पनि वीरगंजका केही निजी विद्यालयहरूले उक्त निर्देशनको अवज्ञा गर्दै आइतबारसमेत पठनपाठन सञ्चालन गरिरहेको पाइएको छ ।
यसलाई लक्षित गर्दै महानगरपालिकाको शैक्षिक प्रशासन महाशाखाले एक सूचना जारी गरी निजी विद्यालय तथा मन्टेश्वरीहरूलाई अर्को सूचना जारी नभएसम्म आइतबारका दिन अनिवार्य रूपमा पठनपाठन बन्द गर्न निर्देशन दिएको हो ।
महाशाखाका प्रमुख आनन्द लामिछानेद्वारा जारी सूचनामा केही विद्यालयहरूले सार्वजनिक बिदाका दिनसमेत कक्षा सञ्चालन गरिरहेको जानकारी प्राप्त भएकाले त्यसप्रति गम्भीर ध्यानाकर्षण भएको उल्लेख गरिएको छ । साथै, महानगर क्षेत्रमा रहेका विद्यालयहरूको अनुगमनलाई थप प्रभावकारी बनाइने तयारी गरिएको पनि जनाइएको छ ।
त्यस्तै, केही निजी विद्यालयहरूले विद्यालय परिसरभित्रैबाट पाठ्यपुस्तक, विद्यालय पोशाक तथा स्टेशनरी सामग्री बिक्री वितरण गरिरहेको गुनासो आएको भन्दै यस्तो गतिविधि तत्काल रोक्न निर्देशन दिइएको छ । निर्देशनको अवज्ञा भएमा कानुनबमोजिम कडा कारबाही गरिने चेतावनीसमेत महानगरपालिकाले दिएको छ ।
महानगरपालिकाका अनुसार विद्यालयलाई व्यापारिक केन्द्रका रूपमा प्रयोग गर्ने प्रवृत्तिले विद्यार्थी तथा अभिभावकमाथि अनावश्यक आर्थिक भार थपिरहेको छ । साथै, पाठ्यक्रम विकास केन्द्रले तोकेकोभन्दा बढी तथा अनावश्यक पुस्तक विद्यार्थीलाई प्रयोग गराउने कार्यप्रति पनि महानगर गम्भीर बनेको छ ।
अत्यधिक पुस्तकको बोझले बालबालिकाको मानसिक तथा शारीरिक विकासमा प्रत्यक्ष असर पर्ने भएकाले यस्तो अभ्यास तत्काल रोक्न निर्देशन दिइएको छ । आवश्यकभन्दा बढी पाठ्यपुस्तक प्रयोग गराई अभिभावकलाई आर्थिक भार र विद्यार्थीलाई तनाव दिने कार्य सह्य नहुने महानगरले स्पष्ट पारेको छ ।
अनुगमनका क्रममा अनावश्यक पुस्तक प्रयोग भएको पाइएमा सम्बन्धित विद्यालय प्रशासनमाथि कानुनअनुसार कारबाही प्रक्रिया अघि बढाइने पनि चेतावनी दिइएको छ ।
महानगरपालिकाले सार्वजनिक बिदाका दिन विद्यालय सञ्चालन गर्ने, विद्यालयबाटै किताब तथा पोशाक बिक्री गर्ने वा विद्यार्थीमाथि अनावश्यक पुस्तकको बोझ थोपर्ने कार्य दोहोरिएमा कुनै पनि हालतमा छुट नदिइने स्पष्ट गरेको छ ।
