वीरगंज । समुदाय–प्रहरी साझेदारी कार्यक्रमअन्तर्गत ट्राफिक दुर्घटना न्यूनीकरणसम्बन्धी सचेतनामूलक कार्यक्रम वीरगंज महानगरपालिका–१३ स्थित पावरहाउसको जीएचपी स्कुलमा सम्पन्न भएको छ।
विद्यालयको सभाहलमा आयोजित कार्यक्रममा स्कुलका प्रिन्सिपल रविन्द्र कौरको सभापतित्व रहेको थियो भने प्रमुख अतिथिका रूपमा प्रहरी नायब उपरीक्षक राजु कार्की सहभागी रहेका थिए । कार्यक्रममा पर्सा ट्राफिक कार्यालयका प्रमुख युवराज कटवालले विद्यार्थीहरूलाई ट्राफिक नियम, सडक सुरक्षा तथा दुर्घटना न्यूनीकरणका उपायबारे अभिमुखीकरण गरेका थिए ।
कार्यक्रमको संयोजन युवा अभियन्ता दिलिप राज कार्कीले गरेका थिए । कार्यक्रममा कक्षा ८, ९ र १० मा अध्ययनरत विद्यार्थीहरूको सहभागिता रहेको थियो ।
सचेतनामूलक कार्यक्रममा सडक नियम पालना, ट्राफिक संकेतको महत्व, मापसे गरेर सवारी चलाउँदा हुने जोखिम लगायतका विषयमा जानकारी दिइएको थियो । विशेषगरी मुख्य सडक आसपास बसोबास गर्ने तथा दैनिक सडक ओहोरदोहोर गर्ने विद्यार्थीलाई लक्षित गर्दै सडक दुर्घटनाबाट बच्ने उपायबारे सचेत गराइएको आयोजकले जनाएको छ ।
कार्यक्रम संयोजक दिलिप राज कार्कीले ट्राफिक दुर्घटना न्यूनीकरणका लागि विभिन्न विद्यालयमा यस्ता कार्यक्रम सञ्चालन गर्दै आएको र आगामी दिनमा अन्य विद्यालयहरूमा पनि विस्तार गरिने बताए ।
त्यसैगरी विद्यालयका सञ्चालक जगजित सिंहले यस्ता सचेतनामूलक कार्यक्रमले विद्यार्थीहरूलाई ट्राफिक अनुशासन र सडक सुरक्षाबारे व्यवहारिक ज्ञान प्राप्त हुने विश्वास व्यक्त गरे ।
